happy birth day

- الجمعة، 27 فبراير 2009



happy birthday to you
happy birthday to you
happy birthday
happy birth day
happy birth day to you

do7a



دى هدية عيد الميلاد


وده أول عيد ميلاد اعمله هنا فى مدونتى

لبنوتة إسمها ضحى
اعرفها من زمااااااااااااان عن طريق منتدى قضيت فيه سنة او اكتر من حياتى

فرحت فيه كتير

وزعلت كتير

بس حبيته وحبيت الاعضاء اللى فيه

لدرجة انى لما سبته ومبقتش ادخل عليه

كان نفسي اخد الاعضاء كلهم معايا واعرفهم

وكانت هى واحدة من الناس اللى حبيتهم هناك

لطريقتها الجذابة فى الكلام

وخفة دمها

وذكائـــــــــــها

وطموحها

وبدون مقدمات كلمتها

بصراحة مش عارفة هى حبتنى ولا لأ

ومش عارفة اذا كانت عندها نفس الرغبة فى صداقتى ولا لأ

او حتى اذا كانت عارفانى كشخصية كويس ولا لأ

بس ده ميمنعش انى اقولها انى مبسوطة انى عرفتها



كل سنة وانتى طيبة



ومحققة كل احلامك

عيد الميلاد لسة فاضل عليه عشر ايام

بس انا

بتمنالها ان كل يوم فى عمرها يكون عيد مش بس ايام ميلادها


لا أبالـــــــــــــــــــــــــــــــــــــى

- الخميس، 19 فبراير 2009


لا أبالــــــــــــــــــــــــــى

إن رأيتك فى خيالــــــــــــــــى

لاأبالــــــــــــى


إن سكنت فى أضلعــــــــــــــى

فى كلامى وإرتجالـــــــــــــــــــــــــــى

لا أبالـــــــــــــــــــى


لم أرد قتـــــــــــــــــــــلك فى قلبـــــــــــــــى
لم أرد سهــــــــــــــــرك ليالــــــى
وإنتظـــــــــــــــارك لإتصالــــــــــــــــــى
فالحب لا يجدى نفعــــــــــــــاً
لم يعـــــــــــد سهــــــــــــل المنــــــــــال ِ


فلذلك يا حبيبــــــــــــــــــى
لا أبالــــــــى .. لا أبالــــــــــــــــى


فلماذا نعبأ بالمحــــــــــــــــال
وننتظـــــــــــر نيل الأمــــــــــال
على أمل أن نبالــــــــــــــى
ولن نبـــــــــــــــالى


فالحب ليس دلالك وجمـــــــــــــــالى
ولا يكمن فى رنـــــــــــــة خلخــــــــــــــــالى
فالحب ترفيــــــــــــــــه ورغـــــــــــد
لم يعد قدر إحتمــــــــــــــــــــــالى


فلذلك يا حبيبـــــــــــــــــى
لا تبـــــــــــالى

لا تبــــــــــــــــــــــــــــالى ..
*

لن أعيش فى جلباب أبى

- الاثنين، 16 فبراير 2009


جايز أكون مقرأتش الرواية بس مين فينا مشفش المسلسل كلنا شوفناه
بس جربتوا قبل كده تتوقفوا عند الأسم (( لن أعيش فى جلباب أبى ))
انا بقي جربت لأ ومش كده وبس أنا توقفت فعلا عنده وحللته وعجبنى
وتمنيت لو أقدر انا كمان اخرج من تحت عباءة أبى .....
مش بس أبى لأ وأمى وزوج المستقبل ....
وحسيت وقتها أد ايه عندنا فى بلادنا الاهالى بيتقنوا انهم يربوا البنات على إنهم يجيدوا دور التابع
عشان البنت تكون متربية ومؤدبة لازم تكون تابع امين بلا رآى فى البيت
حتى لما تتجوز لازم تفضل تابع بلا رآى عشان تكون زوجة مخلصة
وفكرت ليه دايما بحس فى نفسي بروح التمرد على تفكير بنات حوا الاستسلام والاستكانة
مع انى مش بنادى بحقوق المرأة بردوا الزيادة عن اللزوم ولا فكرت فى ده لأن شايفة ان المرأة تقدر تاخد حقها لو هى عايزة ده , انما كتير بيستسلموا وبينسوا اساسا حقوقهم عشان كده حقوقهم هى كمان
بتنساهم ومش بيقدروا ياخدوها ...
أنما مش هو ده اللى بفكر فيه انا كل اللى شغل بالى هو إنى
(( لن أعيش فى جلباب أحد ))
بمعنى انى لازم يكون عندى انا عبائتى الخاصة
كيان مستقل
رآى .. تعبير .. قرار أقدر اخده بنفسي من غير ما اعتمد على حد
احنا فعلا شعب بنربى بناتنا على انهم يكونوا متكلين على الغير
دايما البنت متكلة على ابوها لحد ما تتجوز فتتكل على زوجها
وده سبب انها لما بتفقدهم بتوه لأنها متعودتش تعتمد على نفسها إتعودت انها دايما عندها اللى تقدر تعتمد عليه ...
حتى تفكير اى بنت هو انها تنتقل من بيت الاب لبيت الزوج كأن الحرية من سجن الأب
هو الهروب لسجن آخر عليها انها تجيد دور التابع فيه
(( بتهوى انها تكون تابع ))
ومش معنى كلامى ان البنات تقعد من غير جواز .. ولا انها تخالف الاب والزوج عشان تبقى حرة ومستقلة
بس انها يكون عندها شخصية
هو ده اللى البنات مفتقداه
واللى خلانى احس بكده هو حديث مع والدى وانا معاه فى العربية وببص على العماير الكبيرة على كورنيش النيل وبقوله : ـ
(( لو أقدر اجيب شقة هنا يكون طرازها قديم عشان انا بحب شكلهم اوى ))
بصلى وضحك وقالى : ـ
(( جوزك يبقى يجيبلك ))
وفكرت ليه انا أستنى حد يحققلى احلامى انا
هو حتى احلامى انا مش هقدر اتحمل مسؤليتها
ده من ابسط حقوقى انى لما احلم اكون قد الحلم واحققه لنفسى من غير ما اعتمد على حد
هل البنت ديما محتاجة لشخص تتكل عليه
ولا هى تقدر تخلق لنفسها هدف وتحققه بدون الاعتماد على الغير
هو ده اللى نفسي اعمله ...
وقررت انى اعتمد على نفسي فى تحقيق احلامى
فى اختيار الزوج المناسب ليا
فى تأسيس حياتى معاه (( شركتنا )) عشان تنجح بينا احنا الاتنين
حد يكون مقتنع ان الحياة مناصفة مش متقسمة تلت اربع للراجل وربع للست
ولا متقسمة تلت اربع للست وربع للراجل
هل انا بفكر صح ...؟
بس اللى اعرفه ان عمر الأعتماد على النفس وتكوين الشخصية والكيان المستقل ما كان غلط
طبعا الكلام اللى انا قلته ملوش علاقة ولا بالرواية ولا بالمسلسل
بس ليه علاقة بيا انا
أقولكم تعالو نقرأ الرواية مع بعض للمبدع (( إحسان عبد القدوس ))
لتحميل الرواية : ـ

وإفتكــــــــــــــــــــــــــرت

- الأربعاء، 11 فبراير 2009















قمة فى الإحســــــــــــــــــــــــــــــــــــــــــــــــــــــــاس

هتحس بكده وإنت بتسمعها بصوت حماقى اللى بيقدر يوصل معنى كل كلمة فيها

ووأنت بتشوف التصوير بتاعها خصوصا أول لقطة فى الكليب

لما بتقع عنيه على عنيها وهو فى العربية بيمسح الشبورة من على الازاز

فبتلمحـــــــه وبتقع عنيها عليه

وبتــــــــــــــــــــــقف

تعبيرات وشها والدموع المحبوسة فى عنيها


إنتظارها لأى رد فعل منه



فيكون رد فعله إنه يدير وشه منها يدارا

كإنه مش واخد باله

ويمشى فى طريقه عادى
بس مش عادى فى الحقيقة لأنه اتهز من جواه

أد إيـــــــــــــــــــه....



صعـــــــــــــــــــــــــــــــــــــــب


مش عارفة ليه إتهزيت لما سمعتها .. لما قريتها .. لما شوفتها

جايز أكون إفتكرت ,, لأ أكيد إفتكرت

كل كلمة فيها لمست جرح أو إحساس أو ذكريات أو سنين من عمرى عدت

وإفتكــــــــــــــــــــــــــــــــــــــرت






































حياتي وهو مش فيها
.... سنين عدت رضيت بيها
وفاكر لو قابلت عنيه

عادي جدا هعديها

واديك يللي افتكرت نسيت

.... قابلتو الليلة واتهزيت

طب ازاي في حاجات بتموت

وتيجي الصدفة تحيها


وافتكرت لما جت عيني في عينو
.. سنيني معاه
وافتكرت وعد كان بيني وبينو
.. زمان خدناه
وافتكرت مسكتو في إيدي
.... وإيدي خلاص سيباه





قصادي عيونو محتارة

يقرب ولا يدارا

جه اليوم اللي اشوفو أنا فيه

وما نتكلمش ياخسارة

دي صعبة عليا واعمل إيه ..

مافيش في إيديا شيء تاني

خلاص أهو اسمي شفت عنيه ......

عشان دي بجد وحشاني































وإفتكــــــــــــــــــــــــــــــــــــــرت
وإتهزيـــــــــــــــــــــــــــــت,, وبكيـــــــــــــــــــــت
إفتكرت ناس كتير كانوا فى حياتى ومبقوش
إفتكرت ذكرياتى معاهم ,, أيام جميلة شفت فيها فرحتهم وشافوا فرحتى
كانوا أعز الناس ودلوقتى (( ولا حاجة ))


ياترى هتهز لو قابلتهم
إذا كنت إتهزيت لما إفتكرتهم لوحدى أومال لو شوفتهم






وإفتكــــــــــــــــــــــــــرت

ذكرياتى ومدرستى والمدرسين وزمايلى هناك والأيام اللى عشتها معاهم
لكن دلوقتى هما فين (( مش موجودين ))






وإفتكــــــــــــــــــــــــــــــــرت


أيام طفولتى وشقاوتى الحاجات الجميلة اللى كنت بحبها

لعبى وانا صغيرة جيرانى والجنينة اللى تحت البيت

يااااااااااااااااه كل ده بقى ذكريات وبس






وإفتكـــــــــــــــــــــــــــــــرت


اول مرة قلبى دق فيها لحد أد ايه كنت بريئة وخايفة
أد ايه كانت مشاعر جميلة وفرحة من نوع خاص

أد ايه اسرقت مرة واحدة من غير ما اخد بالى

ياترى هقابل الاحساس ده تانى

ولا هو كان استثناء ومجرد مشاعر مراهقة وعمرها ما هتتكرر تانى

طب والشخص ده لو شفته

ياترى هكلمه ولا لأ

يا ترى هتهز ...





وإفتكـــــــــــــــــــــــــــرت

اول مرة أتجرحت فيها .. أد ايه قاسيت
بكيــــــــــــــــت .. وإتهزيــــــــــــــــــت
أد ايه حسيت بكل مشاعر الحزن اللى موجودة فى الدنيا

بس على الرغم من كل ده مكرهتش
ياترى لو شوفت فى يوم حد من اللى جرحونى هقدر اتكلم معاهم

هقدر اسامح وأغفر
هقدر اتغاضى عن كل احساس بالجرح حسيته
عن كل دمعة نزلت من عنيا من غير ما حد يحس بيها
من غير ما تمسحها ايد غير إيدى




صعـــــــــــــــــــــــــــــــــــــــــب



بس يا ترى لو قابلت حد من دول هتكلم معاهم
ولا هدير وشى
هدارا

وأعمل نفسى مش واخدة بالى
على الرغم من انى هيكون صعب عليا انى مكلمهمش
بس كفاية انى قابلت عنيهم

عشان دى بجد وحشانى




وإفتكــــــــــــــــــــــــــــــــــــــرت



in lovers day

- الثلاثاء، 10 فبراير 2009

فى يوم المحبين ...
يا ترى ايه هيكون موقعى ...؟
سؤال جه على بالى
على الرغم من الاختلاف على اليوم ده بس بحسه يوم مميز اوى فى حياتى
لدرجة انى ممكن اخرج فيه مع اصحابى ,,
مش شرط اكون بحب حد ومش شرط احتفل باليوم كبدعة زى ما بيقولوا
بس بحس انه عهد لتجديد مشاعرك للى بتحبهم
فرصة تقولهم اللى فى قلبك ,,
أعتقد انى هجيب هدايا رمزية لأصحابى اللى بحبهم كتعبير عن حبى ليهم
وممكن اجيب هدية لأمى او لبابا بقالى كتير اوى معبرتلهمش عن مشاعرى ناحيتهم
لدرجة انى بحس ساعات انى جافة بس بدون قصد
يا ترى لو استخدمت اليوم ده بدفا المشاعر اللى جوايا عشان ادوب تلج الايام اللى فاتت
هيكون غلط ......,,
لأ انا كمان نفسي أعتزر .. (( أعتزر لأى حد , وكل حد زعلته ))
أد ايه كلمة الاسف صغيرة ورقيقة بس ليها مفعول جبار انها تدوب قسوة شهور كتيييير
ياااااااه لو تكون سهلة ان الانسان يقولها ......
بس انا هقولها : ـ (( انا اسفة مكنش قصدى ))
هقول لكل اللى اعرفهم حتى لو مش مزعلاهم وفيها ايه مش جايز زعلتهم فى يوم من غير ما اقصد
أد ايه كلمة سهلة ممكن ترجع صداقة انكتبلها الموت
....
كان نفسي يكون عندى حبيب أقدر اعبرله عن حبى ليه بس حاسة ان الزمن ده مش زمن الحب
وانى جاية فى زمن غلط وبتكلم فيه كلام غريب,,
بس أفتكر انه لو كان موجود كنت هعرف ان ليا مكان فى قلب حد ممكن يعبر ليا هو كمان عن حبه
انا مش مستعجلة ,,
أكيد لما ده يحصل هكون فرحانة , لأ هكون أسعد واحدة لإنى قدرت احتل مكانة فى قلب حد
وده فى حد ذاته احساس جميل اوى
طول عمرى بقول ان حب الناس نعمة (( نفسي اكون من المحظوظين بيها ))
تفتكروا حد هيفتكرنى فى اليوم ده
مش محتاجة كلمة طيبة ولا حد يقولى ((happy valentine's day )) بمشاعر باردة وقلوب قاسية
محتاجة شعور طيب اكيد هيفرق
يااااااااااااااه اكيد لو حد اى حد حتى لو طفل قالى فى اليوم ده بالعربى (( انا بحبك ))
هتمنى اقفل قلبى عليها وان شالله اموت بعدها
أنا بقي (( بحب ــــــــــــكم ))
اهلى وجيرانى واصحابى القدام وزمايلى وزكرياتى وبيتى وبلكونتى والشجرة اللى قدام بيتى
بس يا ترى نجحت فى انى اعبر عن حبى ده ...
اتمنـــــــــــــــــــــــــــــــــى

غادة الكاميليـــــــــــــــــــــــــــــــا

- الاثنين، 9 فبراير 2009


http://www.4shared.com/file/55989071/19135064/__online.html?dirPwdVerified=e699dc93

غادة الكامليا من اجمل الروايات اللى قرأتها وأثرت فيا
وحبيتها جدا , وحبيت طريقة الكسندر ديماس فيها
خصوصا انى حسيت انها قصة حقيقة
فأبدع حين صور مرض مارجريت وصراعها الاخير مع الموت
وأبدع حين صور حالة ديفال فى بداية الرواية وعملية نقل جثتها من قبرها إلى آخر
وأبدع حين صور الحب من أول نظرة
أد ايه ابدع الكسندر ديما الابن
فيجعلك تحب غادة الكاميليا (( مارجريت جوتييه )) و((مسيو ديفال )) و(( الشيخ الكبير الذى كان يتولى أمر مارجيريت فى البداية ))
وعلى الرغم انها اتعملت قبل كده أفلام ومسرحيات إلا إنى عمرى ما حسيتها الا لما قريتها
اما كل الافلام والمسرحيات لم التفت اليها ... لأنها لم تصور الاحداث بجمالها واعتمدت على التحريف
فكل كاتب قدمها بطريقته ولكن أجمل من قدمها هو الكسندر ديماس نفسه فى روايته
جايز لو حد قدر يعمل فى يوم من الايام القصة بحذافيرها كفيلم او مسلسل هتكون أروع ما صمم عنها
أترككم معاها.....

رحلة الى مدينة الملاهى ....

- الأحد، 8 فبراير 2009


إمبارح روحت رحلة عائلية
وطبعا كلنا عارفين إن أسوأ شئ ممكن اى حد يعمله ان يروح رحلة عائلية
بس والله كنت مبسوطة هقضى يوم برة بقي بدل الحجر الصحى اللى انا قاعدة فيه
لكن طبعا الموضوع مش بيقتصر على كده
لأن الاوامر الأبوية لازم تشتغل ده غير الشخط والنطركل شوية
واللعبة دى متلعبيهاش واللعبة دى العبيها
هو حتى اللعب فى كبت حرية
القانون مدينى الحق انى العب اللعبة اللى بحبها
وطبعا انا لا أجرأ انى اخالف الاوامر الابوية علناً قدام العيلة كده
فكانت رحلة وعدت ............... ربنا يستر






wild mouse
كانت من ابشع الألعاب اللى لعبتها هناك
قريت القرآن كله وانا ركباها
وبردوا لو روحت هناك هركبها تانى (( عارفة هتقولوا ايه مبحرمش ))
صوتى راح من كتر الصويت الحمد لله
وكل ما اقول اللعبة خلصت الاقى منحدر أبشع من اللى قبله
هما بيعملوا فيا كده ليه .... الله أعلم





لعبة النهر السريع

وااااااااااااه .. إسلاماه

دى الكلمة اللى هتقولها وانت بتحاول وبتجاهد وبتعافر عشان توصلها

دى مش متاهة .. دى سفاهة

وبجد وانا بجاهد عشان اوصلها عرفت بجد مقدار أصالة الإنسان المصرى

ومدى قوة إرادته .. وعزميته على تحقيق أهدافه مهما كانت شاقة

(( ده طبعا فى الحاجات التافهة بس ))

وإذا كنا قدرنا نعبر النهر السريع

أكيد فى يوم من الايام هنحرر القدس



كانت معكم مراسلتكم من قلب المأساة ...

عشان تعرفوا احنا بنتعب اد ايه حتى عشان نتفسح

على رأى الناس فى طابور العيش (( قصدى فى متاهة النهر ))

بنشترى تعبنا بفلوس


وطبعا روحت كنت بدور على سريرى فى جميع انحاء الشقة بعد هذا اليوم الشاق
وبغنى أغنية عبد الحليم الشهيرة

(( انا كل ماا اجول التوبة يا ابويا ترمينى المقادير يا عين ))
اسيبكوا تسمعوهاااااااااا

خائفة من شئ ما

- الجمعة، 6 فبراير 2009


خائفة من شئ ٌ ما
فلا تدعنى ألقاه ُ
وخذ بيــــــــــدى
رتب على كتفـــــــــــــى
وأنظر أمامك ,,
فتش فى آثار أقدامه
تحسبا ً لخطاه ُ
وزيل الدماء ُ من على هندامى
وأمحى الغمامة لأرى الطريق أمامى
فأنا الأسيرة ........
وأنت بصرى وخطى أقدامــــــــــى
فأنا الطريق ........
وأنت منتهـــــــــــــــــــــــــــاه
وساعدنى لنحطم الجدران
إشعرنى بالأمـــــــــــــــــــــــان
فأخطو خطى النسيـــــــــــــان
وأطعن لى المجهول وتسبب فى شقاه ُ
ولنسير فى الشارع الطويـــــــــــــــــل
غير مكترثيـــــــــــــــــــــن
نشق فى الليـــــــــــل الطريق .. متوارييــــــــــن
داعييــــــــــــــــــن الرب ألا نــــــــــــــــراه ُ
فمعه كانت لحظات إنكسارى
وهناك القرار قراره وليس قرارى
وليالــــــــــى الأسر توقظ حــــــــرمانى , وتطيـــــــــل إحتضارى
فضم بـــــــــــــــأسى
فمازالت بداخلى بقايا طامحــــــــــــــــــــة فى الحيـــــــــــــــــاة,,,

surgery

- الأربعاء، 4 فبراير 2009



ايه يكون شعور أى فرد لو حضر عملية جراحية ..؟

بشرط انه يكون مش طبيب ولا يعرف أى شئ فى الطب ...

اكيد شعور مختلف جدا عن شعور الطبيب اللى بيعتبر الطب مهنة والمريض حالة

مجرد حالة عايز يخلصها بسرعة عشان ياخد اللى بعدها ..

بعيدا تماما عن المشاعر الانسانية اللى بيشعر بيها اهل المريض لو حد دخل منهم حجرة العمليات ...

وأعتقد كمان انه شعور مختلف عن شعور طبيب مبتدأ أول مرة يخش حجرة عمليات بجد لأن بطبيعته هيكون قلقان اوى ومضطرب بس ده لأنه بيطمح فى إنه يحقق نجاح فى مشواره من ورا الحالة دى مش من اجل المشاعر الانسانية ناحية المريض...

أفتكر ان طبيعة مهنة الطبيب بتخلى متحكم فى أعصابه .. لازم يحاول انه يبعد عن اى انفعال

ولازم يتعامل مع المريض على انه مجرد حالة .. مش معنى كده انه مش بيشعر تجاهه بمشاعر انسانية بس اللى متأكده منه انها مشاعر مختلفة تماما ً عن مشاعر الشخص العادى خاصة لو من أهل المريض


(( اليوم حضرت عملية جراحية بسيطة جدا ً لشخص من أقاربى كنت انا كالمسؤلة عنه ))

والغريب انى قدرت أشاهد العملية دى بدون أن أزيح وجهى او أن اغمض أعينى

فشاهدت الطبيب وهو يعطيها مخدر البينج ورأيت الخوف بعينيها والدموع تسيل منها من الالم

أما هو فلم يلتفت إلى هذا الخوف أو تلك الدموع كإنه منهمك بعمل أقوى من الإلتفات لهذه المشاعر البلهاء

وبعد ذلك قال كلمته المعتادة :ـ (( لن تشعرى بشئ بعد الآن...))

لكنها كانت تشعر بالخوف كأن الألم سيتخلل إليها عبر المخدر فهى طفلة لم تتجاوز الأثنى عشر عاماً

ورأيتها تغمض عينيها تدفن رأسها بين ذراعى أمها خوفاً من أن ترى شكل الدماء

ورأيت الطبيب غير مكترث بمشاعر طفلة بريئة يشهر مشرطه الحاد يصرخ بها : ـ (( لا داعى للبكاء ))

فبدأ فى جرح بشرتها الرقيقة بعنف فتدفقت الدماء بغزارة ثم إقتلع جزء من لحمها

وكأنه قطعة من القماش يقتلع منها ما لا يعجبه ثم يقوم بنسج الباقى..

فرأيته جاد جدا ً لا ينظر إليها إطلاقاً غير مكترث الا بمشرطه وكإنه يعزف سيمفونيه ولا يريد اى تدخل خارجى حتى ولو من المريضة نفسها ..

ثم بدأ فى تنظيف الجرح ببطئ وبدأ بعد ذلك فى حياكة الجرح ورأيته وهو يغزل بشرتها الرقيقة حتى إنتهى

ثم قام بوضع القطن والشاش على الجرح المزعوم وغلفه

ثم قال : ـ (( حمد الله على السلامة , تقدرى تمشى دلوقتى ))

وأخذت أمسح دموعها وكإنى ألملم بقايا طفلة مجروحة وهو تقول : ـ (( مش عايزة أعمل عمليات تانى ))

وهنا تسائلت : ـ

( هل شعر الطبيب بكل ما شعرت به أنا , هل فكر فيما فكرت بها , أم أن مشاعره وتفكيره كانا مختلفان ؟)

((هل كلف نفسه عناء التفكير فى مشاعر هذه الطفلة بعد تلك الجراحة , أم إنها مجرد حالة قد مرت فليستعد للحالة القادمة ..؟))

هل الطبيب ما هو إلا آلة تؤدى عملها لابد ان يفصل نفسه عن كل هذه المشاعر الانسانية التى أعتبرها ضرورية للشعور بالحياة ..؟


((لو كده يبقى يا بخته .. لأنه بيقدر يلغى مشاعره فى أى وقت ))

لاااااا داعـــــــــــــــــــى

-

لاااا داعى
لأن أراكـــــــــــــــــــــِ
لاااا داعــــــــــــى
لذكراكــــــــــــــــــــــــِ
فلا تحتاجين لخداعـــــــــــــــــى
فقط قولــــــــــــى .. لا داعـــــــــــــى
فقربـــــــــــــــــــك ِ إحتراق
وبعدكــــــــــــِ إحتراق
أقضيه فى إشتيــــــــــاق
وتسخريــــــــــن بطباعــــــــــــــــى
فلا تحتاجيــــــــن إقناعــــــــــــــــى
فقط قولـــــــــــــى .. لا داعـــــــــى
ولا تبكى من إمتناعـــــــــــى
فلن أمانـــــــع فإرحلــــــــــــــى
لست ُ ثرثاراً .. مليكتــــــــــــــى
إن أردتـــــــــى .. فإهجــــــــــــــــرى
فلا تنشديــــــــــن ردعــــــــــى
ولا تتأزمـــــــــى لوضعــــــــى
فلا تعنيـــــــــــــــك ِ أوضـــاعـــــــــى
فقط قولــــــــــــــى ... لا داعـــــــــــــــــــــــــــــــى ,,,.

أتعرف ما معنى الكلمة ..؟

- الاثنين، 2 فبراير 2009

يقول الحسين في حواره .. مع الوليد .. كما جاء في " الحسين ثائراً لعبد الرحمن الشرقاوى " :
الوليد .. نحن لانطلب إلا كلمة .. فلتقل بايعت واذهب بسلام إلى جموع الفقراء
فلتقلها واذهب ياابن رسول الله حقنا للدماء
فلتقلها ما أيسرها إن هي إلا كلمة ..
الحسين : كبرت كلمة
وهل البيعة إلا كلمة
ومادين المرء سوى كلمة
وماشرف الله سوى كلمة
ابن مروان : بغلظه فقل الكلمة واذهب عنا ..
الحسن .. أتعرف مامعنى الكلمة
مفتاح الجنة في كلمة
دخول النار على كلمه
وقضاء الله هو كلمه
الكلمة لو تعرف حرمه زاد مزخورالكلمة نور ..
وبعض الكلمات قبور
وبعض الكلمات قلاع شامخه يعتصم بها النبل البشري
الكلمة فرقان بين نبى وبغي
بالكلمة تنكشف الغمة
الكلمة نور
ودليل تتبعه الأمة .
عيسى ماكان سوى كلمة
أضاء الدنيا بالكلمات
وعلمها للصيادين فساروا يهدون العالم
.. الكلمة زلزلت الظالم
الكلمة حصن الحرية
إن الكلمة مسؤولية
إن الرجل هو كلمة
شرف الرجل هو الكلمة
شرف الله هو الكلمة

الكلمة نور .... عشان كدا لازم نحافظ على ما يخرج من فمنا من كلمات

فقد تجرح الكلمة وقد تقتل وقد تدمر اشخاص

فالكلمة صدقة .. فما اجمل ان نفوز بها

فلولا اهمية الكلمة ما اصبحت صدقة فحافظوا على كلماتكم


مشربتش من نيلها , جربت تحنلها

-

عمرك جربت تحنلها وانت فيها ......؟
اصلها وحشانى اوى

مصــــــــــــــــــــــــــــــــــــــــــــــــــر
ايوا مصر يا عم امال بهزر معاك , إلا هى راحت فين بقالى قرنين كده مش شايفاها..!


عمرك جربت تحن لبلدك كإنك فى غربة وانت جواها
تستغرب اهلك وناسك
مدينتك مكانك بيتك كإنك فى بلد بعييييييييييد بعيد اوى اوى عن مصر
مصر مش ارض وتراب وبس لأ
مصر المعنى
((إدخلوها بسلام آمنين ))

إذن المعنى بتاع مصر هو (( الأمــــــــــــــــــــــــــــان))
فى ناس كتير ضيعوا المعنى وفضلوا الارض والتراب زى ما هما
مع ان المعنى ثابت جوا ناس تانيين
بس جايز عشان الوحش دايما بيكون أوضح بكتير من الحلو ودايما الشر تأثيره أقوى من الخير
على الاقل فى زمننا ده .........

تفتكروا الاحساس بالغربة ده هيستمر كمان قرنين ولا حاجة
ولا بقدوم سنة جديدة ممكن نتقدم فعلا للأحسن فى مشاعرنا ومبادئنا
ونحس فيها اخيرا بالامان ..؟


أتمنى ذلك ....

no name....

-

((it just the beginning))

الموضوع ده هو مجرد البداية
عشان نتعرف ببعض ....
كل شئ ليه بداية ونهاية
ساعات بيتكون البداية حلوة اوى بس ده مش شرط عشان النهاية تكون بنفس الجمال
وكمان ساعات بتكون البداية قاسية وغير مبشرة بس النهاية بتكون جميلة فوق المتوقع
بتمنى ان مدونتى تكون مجرد بداية للجمال والحب والخير
اللى بعتبرهم من اجمل المعانى الانسانية
مش مهم انا مين وانتوا مين المهم نقدر نعمل ايه واقدر اوصلكم افكارى
اللى يارب تحوذ إعجابكم .............

الاشتراك في: الرسائل (Atom)