الصوره الرمزيه لمدونتك بتعبر عن ايه ...؟
أكيد بتعبر عن مكنون شخصيتى يعنى ..و دى محتاجة فلسفة :D
انا عامة بحب اغيرها مش بحب الصورة تكون ثابتة وده راجع لأنى شخصية غير روتينية
يعنى احب اكسر الملل...
هل فكرت في اغلاق المدونه ؟ والسبب ..؟
بتاتا ً , إطلاقا ً , مطلقا ً , أبدا ً
لأن مفيش سبب يخلينى اقفل مدونتى
خصوصا انى بحبها
مهما كانت الدوافع....
ايه رد فعلك لو حد قل ادبه عليك في تعليق ...؟
مش هرد عليه لسبب بسيط جدا هو: ـ
(( إن أفضل رد هو عدم الرد ))
وبدام فيها قلة أدب اكيد همسحه لأن مدونتى هيدخل عليها ناس ميصحش ألوث أذهانهم بكلماته
اسوء مدونه...؟
مفيش أسوء وده لأن كل مدونة بتعبر عن وجهات نظر مالكها وهو حر فيما يكتب
وانا حرة فيما أقرأ
طالما مفيش ضرر
وعلى المتضرر اللجوء للقضاء :D
هيحصل ايه للايميل بتاعك لما تموت...؟
بعد الشر عليا :))
قصدك بعد عمر طويل يعنى :D
أفتكر ان ايميلى هيدفن معايا
كذكرى خاصة بيا انا لوحدى مش من حق حد يطلع عليها وبموتى بتموت
اديت الباسوورد بتاعك لحد ...؟
لأ متعودتش أديه لحد لأنه من خصوصياتى
وأفتكر ان محدش حتى بعد موتى هيهتم بخصوصياتى
السفر بالنسبالك ايه ...؟
متعة بتمنى أجربها خصوصا برة مصر
حلــم إنى ألف الدنيا كلها من شرقها لغربها وشمالها وجنوبها
ومش بر ولا جو لأ
على متن سفينة فى البحر
أحلام يقظة بقى :D
بس انا عامة مسافرتش غير جوة مصر روحت محافظات كتير
وبحب تجربة السفر عامة
المود بتاعك ؟
بيتغير بتغير الظروف أكيد يعنى
بس النهاردة مود عادى جدا
وعندى احساس انى نفسي أكسر الملل ده
بتعمل ايه في وقت فراعك..؟
هههههههههههههههه
مش لما يبقى فيه وقت فراغ أصلا ً
مش هقولكم الكتابة او الرسم لأن دول من الاساسيات مش محتاجين وقت فراغ عشان أعملهم
بس هقول انى لما بيتواجد عندى وقت زيادة بحب ازور اصحابى من زمان
وأكلم قرايبى وزمايلى واتفرج على التليفزيون ههههههه
الأكلة المفضله
كل نعمة ربنا حلوة :)
بس انا بحب أكلــة أعتقد الكل مبيقدرش يقاومها
(( محشى ورق العنب مع ملوخية على شوربة البط ومعاها بط طبعا ً :D
وطبعا ده لا يمنع وجود حمام محشى بالفريك معاهم :))
ويا سلام بقي لو كوباية شاى تقيل سكر زيادة بعدهم ومش فى الخمسينة ))
انا عارفة انى جوعتكم
الصفات اللي ورثتها عن والدك.؟
راسى النشفة :D
الصفات اللي ورثتها عن والدتك ..؟
أولا : ـ شكلــها لأنى ورثت معظم ملامحها
ثانيــا ً: ـ عنادها
ثالثاً بقي طموحها وأحلامها اللى كانت بتحلمها وهى فى سنى
اكتر ست حاجات بتكرهها...؟
1.بكره أوى التشاؤم أو انى اشوف حد متشائم وشايف الدنيا سودا ومفيش أمل
2. الفوضى خصوصا فى الشغل ده لأنى أحب التزم بالحاجات اللى بعملها
ولما الفوضى تدخل فى مشاريعى بصرف نظر عنها لأن الفوضى اول طريق للفشل
3. انا بكره الكره نفسه .. عشان كده مكنتش لاقية اجابة للسؤال ده وأفتكر ان الحاجات اللى مش بحبها مش كتير
4. بكره الألم ومش بقدر أشوف حد بيتألم أبدا ممكن يجيلى إكتئاب
وأفتكر انى دخلت القصر العينى فى مرة نفسيتى تعبت فترة طويلة
بجد لو المرض والألم كان راجل كنت قتلته ورحيت الناس
يمكن عشان كده كان نفسي ابقى دكتورة بس الحمد لله ربنا ستر :D
5. الفقر نفسي مشوفش حد فقير وتعبان فى حياته
حد نفسه فى شئ ومش قادر يجيبه
حد تعبان ومش معاه حق علاجه
6. مش بحب الحقد والغدر والخيانة والكدب
اكتر ست حاجات بتحبها...؟
1. الطبيعة والهوا والبحر والسما والخضرة وجمال الكون نفسه بحب الحاجات دى جدا
2. أكتر حيوان بحبه وبعشقه هو الحصــــان (( الفــرس)) بحب إعتزازه بنفسه وكرامته
3. بحب الفن بحب اسمع الاغانى القديمة لأم كلثوم وعبد الحليم وعبد الوهاب وأسمهان وفيـــــــروز
وبحب بردوا عمرو دياب وصوت اليسا وكاظم الساهر وأصاله
وبحب اتفرج على كل فيلم او مسلسل يكون ليه قصة وحلو وبحب الافلام الاجنبية الرعب (( وده ملوش علاقة بالخيال العملى لأن مش بحبه )) والرومانسية الكوميدية
4. بحب القراءة جدا جدا بحب أقرأ شعــر و أدب
بحب الروايات الرومانسية من الادب العالمى وروايات ليو توليستوى و تشارلز ديكينز
بحب كتب ديل كارينجى ومسرحيات شكسبير بحب أقرا لأنيس منصور وفاروق جويدة
وإحسان عبد القدوس وباولو كويليو
5 . بعشق الورقة والقلم ومكدبش لو قلت إنهم أصدقائى المقربين منى جدا جدا
بعشق فن الكتابة بعشق أعزف بقلمى لحن أنا حباه وإحساس أكون حاسة بيه
بحب أكتب قصص وروايات وده يمكن راجع لـتأثرى بحبى لقرائتهم
بحب أكتب الخواطر اللى إنتوا بتقروهالى بحس بإحساس جميل أوى لما كلامى ده وخواطرى تعجبكم
وبتمنى فى يوم من الايام أكتب اول قصة طويلة ليا
وأكتب كمان قصيدة متكاملة مش مجرد خاطرة
6. بحب الرســـــــم جدا ده تسليتى الوحيدة وبحس انه هو والكتابة وجهين لعملة واحدة
شخصيتك نوعها ايه....؟
نوعها N95
ههههههههههههه
الحقيقة مش فهماله السؤال ده
لماذا دخلت عالم التدوين ...؟
لحبى للكتابة لأنه الطريق الوحيد اللى أقدر أعرض فيه اللى بكتبه بحرية
اجمل كلمه اتقالت في وصف مدونتك.....؟
كل الكلام اللى اتقال عنها انا بقف عاجزة قدامه عن الرد والشكر
الحــمد لله
أهمية التعليق بالنسبه ليك ؟
التعليق بيكمل موضوعى بيكمل سطورى زى كلمة النهاية او الخاتمة بتاعة أى موضوع
احسن بوست كتبته ....؟
كل بوست بكتبه فى وقته بحس انه أحسن بوست كتبته
افضل بوست قرأته ...؟
بلاش أحدد عشان منساش حد بس أقدر أقول ان اصدقائى فى التدوين اللى متابعاهم هما اكيد عارفين نفسهم
انا بجد بحب كتاباتهم جدا
الشغل بالنسبالك ايه ؟
الشغل هو كيان الانسان هو اللى بيشكل ذاته وأعظم تجربة الانسان بيمر بيها خصوصا لما يكون مجال بيحبه
النت بالنسبالك ايه ؟
وسيلة بقدر احقق من خلالها غاية أكبر منها بكتير
تمرر التاج لمين...؟
لأى حد عايزه ههههههههه
الحقيقة مش عايزة أورط حد
بس ممكن أقول حبيبة قلبى غرووب لأنى أحب أعرفها اكتر
وده لو هى حابة تاخده
عارفة انى طولت عليكم بس حبيت أتكلم فى حيز اكبر شوية من المسموح بيه لأن الموضوع ده للتعرف على شخصيتى ولو إن ده صعب من خلال الكلمات
مش عايزة أثقل عليكم فى التعليق
وإن شاء الله بكرة هيكون فيه موضوع جديد
تحيــاتى لكل من زارنى وشغل باله بالرغى بتاعى
**************************************
فاكرين اغنية ليلى مراد 
