عائلتى الصغيرة الجميلة

مش عارفة ليه اول ما شوفت الصورة دى
لقيت نفسي بفتكر أغنية محمد منير :
أمى الحبيبة .. أمى الحنون
أنا كنت فين قبلك أنا
ومن غيرك إزاى أكون
***************
انا مش فاكرة كتير عن ايام طفولتى وعن مواقفى فيها
بس بيتحكيلى عنها
بس انا فاكرة كل تفصيلة صغيرة من تفاصيل حياتى لما كبرت
فاكرة.. كل موقف جمعنى بمامتى وبابايا
فاكرة سهرايتى مع ماما كل يوم نقعد نتكلم للفجر
مش عارفة ليه حاسة انى بكلم عن صديقة مش بس أم
مش بخجل أحكيلها أدق تفاصيل حياتى
جايز لأنها الوحيدة اللى عندها إستعداد تقدملى نصيحة بجد
جايز لأنى واثقة من حبها ليا وحبى ليها
وإنها العلاقة الوحيدة البشرية اللى مش مبنية على مصالح مشتركة
بس الاجمل والافضل
هو البيت اللى بحس فيه بالامان بصرف النظر عن اى حاجة تانية
الأمان نعمة من ربنا
والمكان الوحيد اللى مش بخاف فيه هو حضن ماما وبابا
ومن أجمل ايام حياتى معاهم
هى الايام اللى بخرج فيها مع بابا
وانا متشعلقة فى ايده زى الطفلة الصغيرة
أو اللى بسهر فيها فى البيت مع بابا وماما نتفرج على فيلم أول مرة يجى ونضحك واحنا بنعلق عليه
ولا ليلة العيد لما ننزل عيلة كاملة نشترى لبس العيد من مصر الجديدة ولا وسط البلد ومنرجعش الا على الفجر
ولا سفرة رمضان وتشجيع ماما و بابا ليا انى أختم القرآن
ولا المصيف فى إسكندرية اللى قضيت فيها اجمل أيام حياتى
بجد انا بحبهم اوى
جايز زحمة الدنيا بتنسينى أقولهم بحبكم
بس انا بقدملهم شهادة تقدير وإحترام
لأنهم مش مخلينى حتى محتاجة لأنى أعيش مشاعر مراهقة أو طيش
عشان أعوض شئ مفتقداه
لأنى مش مفتقدة حاجة
ربنا يخليكم ليا .. ويشفيكى يا أمى ....

18 التعليقات:



Tamer Nabil Moussa يقول...

السلام عليكم

كل سنة وكل ام بخير

الام هى الحب الحقيقيى فى حياة كل انسان

ربنا يشفى والدتك وتكون فى ات صحة

ربنا يكرمك

تحياتى

الشاعر الحزين يقول...

أول تعليق ليا فى مدونتك الجميله

ومن هنا بدعيل يارب يشفى والدتك يارب ويحميها وأنتى معاها وجميع عائلتك الكريمه من كل سوء يارب تقبل

وتقبلى خالص تحياتى لكى

فشكووول يقول...

العزيزه عايده ... صح الاسم
تحياتى
الام مدرسة اذا اعددتها
اعددت شعبا سيد الاعراق
كل سنه وانت وماماتك بالف خير
تحياتى

aidy يقول...

tamer nabil

***************

وعليكم السلام ورحمة الله وبركاته

متشكرة على تعليق حضرتك والدعاء

حضرتك نورت المدونة

وهستنى تشريف حضرتك مرة تانية

تحياتى ..,,

aidy يقول...

الشاعر الحزين
***************

أولا انا متشكرة على تشريف حضرتك للمدونة

ثانيا متشكرة جدا جدا على الدعاء وانا لا أملك سوى أن أقول لكم ..


آمين ربنا يستجيب يارب ...

ويشفى جميع مرضاه


ومنتظرة تشريف حضرتك تانى للمدونة

تحياتى ,,

aidy يقول...

fashkool
***********

أولا أهلا بحضرتك ...

ثانيا ً الحقيقة إسم عايدة صحيح بس هو مش إسمى الحقيقى أنا أخدته من أوبرا عايدة لأنى بحبها

أوبرا عايدة الحقيقية وأوبرا عايدة المسلسل بتاع الفخرانى... اللى خلانى احب الاوبرا

متشكرة على تعليق حضرتك وبتمنى تكرير الزيارة مرة تانية

تحياتى ..,,

رؤية يقول...

كل عام وهى بخير وانتى بها بارة
والف سلامة عليها

تحياتى

بـسـمـــة صـــــلاح يقول...

زغرووووووووووووووووووووته
قدرت اعلق يانااااااااس
كلامك سيمبل وجميل جدا
ربنا يخليهوملك يارب
وكل سنه وهما طيبين
دمت بكل ود
تحيـ بسومةــاتي(:

aidy يقول...

رؤية
*********

أولا أهلا بيكى

ثانيا كل عام وكل امهاتنا بخير

متشكرة على تعليقك ومنتظرة تشريفك ليا تانى

تحياتى ,,

aidy يقول...

بسمة صلاح

***********

بسومة حبيبتى

اخيرا دخلتى ...

انا اللى هزغرط

انا مبسوطة انك دخلتى وشكرا على تعليقك ياقمر

مستنياكى تانى

سلام

سحساوي يقول...

ياه انت رجعتيني بالذكريات الجميلة اللي في أسرتي، و كل ما أقرأ حاجة أفتكرها مع أسرتي بدوا ، الأب و الأم تعبوا أول عشان نعيش في أمان ، ربنا يسعدهم
شكرا يا aidy على الذكريات الجميلة اللي عيشتينا فيها .

ادم المصرى يقول...

كل سنه وولدت حضرتك بخير وسعاده وربنا

ميحرمك منها ولا يحرمها منك ابدا

ويجعلكو فى امان ورضا الرحمان

شفـقــة و إحســــان يقول...

ربنا يخلي أحبابك ويخليكي ليهم
ويشفي أمك ويعجل بشفاها يارب
وكل سنة وهيا وكل أم طيبة وبخير

aidy يقول...

سحساوى
**********

أولا أهلا بحضرتك

ثانيا بقى انا اللى متشكرة على التعليق

وفعلا الاب والام اجمل نعمة ربنا ادهالنا عشان نحافظ عليها

شرفنى مرورك

تحياتى

aidy يقول...

ادم المصرى
**********

اولا اهلا بحضرتك

ويارب كل الامهات تكون بالف خير وربنا يقدرنا ونقدر نكون بارين بيهم

وشكرا على الدعوات الجميلة دى

منتظرة تشريف حضرتك تانى,,

تحياتى

aidy يقول...

شفقة هانم واحسان بك

********************

أهلا بمرورك الاول

متشكرة جدا على التعليق الجميل والدعوات الاجمل

ومنتظرة تشريفك تانى

تحياتى ..

محمد مصطفى يقول...

انا حبيتهم من حبك ليهم
وفي تشابه كبير بين تفاصيل حياتك
وذكرياتي مع ولدي وامي
مشاعر متنفعش تتعاش غير معاهم
حب من نوع خاص
متنسيش تقوليللهم الكلمة

aidy يقول...

ههههههههههههههههههههههههه

ازيك يا محمد

على فكرة انا لسة منزلتش الموضوع الجديد

بس افتكر انى بخصوص حبى ليهم بقدر اترجمه عملى

واكيد هما بيحسوا بده :)