قعدت على كرسى الأعتراف

جمعوا صورة كاملة عن شخصيتى

تكسبوا التاج ده ههههههه

**********************************

الحقيقة انا جالى التاج من صديقة المدونة وحبيبة قلبى بسمة صلاح

فأقدر أقول

إستعنت على الشقا بالله


وآدى قعدة كمان عشان ندردش مع بعض براحتنا

*******************************



اسمك....؟
نهـــــــــاد (( الحقيقى )) أما اسم aidy ده فده نابع من حبى لشخصية عايدة

فى اوبرا عايدة لأنى قريت قصتها وحبتها اوى

واللى خلانى احب الاسم ده وابحث عن القصة دى كان مسلسل للفخرانى بحبه

اسمه اوبرا عايدة

إتفقنا أديكوا عرفتوا أهو.....


سنك...؟
واحد وعشرون عاما ً تحت الاختبارولسة لغاية دلوقتى مطلعتش بأى نتيجة

يا مسهل .... :D



مجال دراستك ؟

حاليا انا فى السنة النهائية من كلية الاداب جامعة القاهرة

يعنى كلها زلطة واطلع برا :D


بدرس بقي فى الكلية علم التاريخ اللى خلانى افهم سياسة كويس

الشر برا وبعيد عنكوا طبعا ً :D

خدت دورة تدريبية صحافة واتدربت عملى فترة كمان واحتمال اكمل في المجال ده

ربنا يستر

اسم مدونتك ..؟
without identity

بدون هويــــــــــــــة

يعنى بمعنى أصح لسة مطلعتلهاش بطاقة أصلها لسة قاصر.. :D

بصراحة محبتش اختار اسم يحدد اقامتى فى مواضيع معينة

لأنى عايزة اكتب براحتى فى اى موضوع احبه



الصوره الرمزيه لمدونتك بتعبر عن ايه ...؟

أكيد بتعبر عن مكنون شخصيتى يعنى ..و دى محتاجة فلسفة :D

انا عامة بحب اغيرها مش بحب الصورة تكون ثابتة وده راجع لأنى شخصية غير روتينية

يعنى احب اكسر الملل...


هل فكرت في اغلاق المدونه ؟ والسبب ..؟
بتاتا ً , إطلاقا ً , مطلقا ً , أبدا ً

لأن مفيش سبب يخلينى اقفل مدونتى

خصوصا انى بحبها

مهما كانت الدوافع....


ايه رد فعلك لو حد قل ادبه عليك في تعليق ...؟
مش هرد عليه لسبب بسيط جدا هو: ـ
(( إن أفضل رد هو عدم الرد ))


وبدام فيها قلة أدب اكيد همسحه لأن مدونتى هيدخل عليها ناس ميصحش ألوث أذهانهم بكلماته

اسوء مدونه...؟


مفيش أسوء وده لأن كل مدونة بتعبر عن وجهات نظر مالكها وهو حر فيما يكتب

وانا حرة فيما أقرأ

طالما مفيش ضرر


وعلى المتضرر اللجوء للقضاء :D



هيحصل ايه للايميل بتاعك لما تموت...؟

بعد الشر عليا :))
قصدك بعد عمر طويل يعنى :D


أفتكر ان ايميلى هيدفن معايا


كذكرى خاصة بيا انا لوحدى مش من حق حد يطلع عليها وبموتى بتموت


اديت الباسوورد بتاعك لحد ...؟

لأ متعودتش أديه لحد لأنه من خصوصياتى

وأفتكر ان محدش حتى بعد موتى هيهتم بخصوصياتى

السفر بالنسبالك ايه ...؟

متعة بتمنى أجربها خصوصا برة مصر

حلــم إنى ألف الدنيا كلها من شرقها لغربها وشمالها وجنوبها

ومش بر ولا جو لأ


على متن سفينة فى البحر


أحلام يقظة بقى :D




بس انا عامة مسافرتش غير جوة مصر روحت محافظات كتير

وبحب تجربة السفر عامة


المود بتاعك ؟

بيتغير بتغير الظروف أكيد يعنى

بس النهاردة مود عادى جدا

وعندى احساس انى نفسي أكسر الملل ده


بتعمل ايه في وقت فراعك..؟

هههههههههههههههه

مش لما يبقى فيه وقت فراغ أصلا ً


مش هقولكم الكتابة او الرسم لأن دول من الاساسيات مش محتاجين وقت فراغ عشان أعملهم


بس هقول انى لما بيتواجد عندى وقت زيادة بحب ازور اصحابى من زمان


وأكلم قرايبى وزمايلى واتفرج على التليفزيون ههههههه


الأكلة المفضله

كل نعمة ربنا حلوة :)


بس انا بحب أكلــة أعتقد الكل مبيقدرش يقاومها


(( محشى ورق العنب مع ملوخية على شوربة البط ومعاها بط طبعا ً :D


وطبعا ده لا يمنع وجود حمام محشى بالفريك معاهم :))


ويا سلام بقي لو كوباية شاى تقيل سكر زيادة بعدهم ومش فى الخمسينة ))


انا عارفة انى جوعتكم


الصفات اللي ورثتها عن والدك.؟


راسى النشفة :D


الصفات اللي ورثتها عن والدتك ..؟


أولا : ـ شكلــها لأنى ورثت معظم ملامحها

ثانيــا ً: ـ عنادها

ثالثاً بقي طموحها وأحلامها اللى كانت بتحلمها وهى فى سنى


اكتر ست حاجات بتكرهها...؟


1.بكره أوى التشاؤم أو انى اشوف حد متشائم وشايف الدنيا سودا ومفيش أمل

2. الفوضى خصوصا فى الشغل ده لأنى أحب التزم بالحاجات اللى بعملها

ولما الفوضى تدخل فى مشاريعى بصرف نظر عنها لأن الفوضى اول طريق للفشل


3. انا بكره الكره نفسه .. عشان كده مكنتش لاقية اجابة للسؤال ده وأفتكر ان الحاجات اللى مش بحبها مش كتير


4. بكره الألم ومش بقدر أشوف حد بيتألم أبدا ممكن يجيلى إكتئاب

وأفتكر انى دخلت القصر العينى فى مرة نفسيتى تعبت فترة طويلة

بجد لو المرض والألم كان راجل كنت قتلته ورحيت الناس

يمكن عشان كده كان نفسي ابقى دكتورة بس الحمد لله ربنا ستر :D


5. الفقر نفسي مشوفش حد فقير وتعبان فى حياته

حد نفسه فى شئ ومش قادر يجيبه

حد تعبان ومش معاه حق علاجه


6. مش بحب الحقد والغدر والخيانة والكدب


اكتر ست حاجات بتحبها...؟


1. الطبيعة والهوا والبحر والسما والخضرة وجمال الكون نفسه بحب الحاجات دى جدا

2. أكتر حيوان بحبه وبعشقه هو الحصــــان (( الفــرس)) بحب إعتزازه بنفسه وكرامته

3. بحب الفن بحب اسمع الاغانى القديمة لأم كلثوم وعبد الحليم وعبد الوهاب وأسمهان وفيـــــــروز

وبحب بردوا عمرو دياب وصوت اليسا وكاظم الساهر وأصاله

وبحب اتفرج على كل فيلم او مسلسل يكون ليه قصة وحلو وبحب الافلام الاجنبية الرعب (( وده ملوش علاقة بالخيال العملى لأن مش بحبه )) والرومانسية الكوميدية



4. بحب القراءة جدا جدا بحب أقرأ شعــر و أدب

بحب الروايات الرومانسية من الادب العالمى وروايات ليو توليستوى و تشارلز ديكينز

بحب كتب ديل كارينجى ومسرحيات شكسبير بحب أقرا لأنيس منصور وفاروق جويدة

وإحسان عبد القدوس وباولو كويليو



5 . بعشق الورقة والقلم ومكدبش لو قلت إنهم أصدقائى المقربين منى جدا جدا

بعشق فن الكتابة بعشق أعزف بقلمى لحن أنا حباه وإحساس أكون حاسة بيه

بحب أكتب قصص وروايات وده يمكن راجع لـتأثرى بحبى لقرائتهم

بحب أكتب الخواطر اللى إنتوا بتقروهالى بحس بإحساس جميل أوى لما كلامى ده وخواطرى تعجبكم

وبتمنى فى يوم من الايام أكتب اول قصة طويلة ليا

وأكتب كمان قصيدة متكاملة مش مجرد خاطرة



6. بحب الرســـــــم جدا ده تسليتى الوحيدة وبحس انه هو والكتابة وجهين لعملة واحدة


شخصيتك نوعها ايه....؟


نوعها N95

ههههههههههههه


الحقيقة مش فهماله السؤال ده


لماذا دخلت عالم التدوين ...؟



لحبى للكتابة لأنه الطريق الوحيد اللى أقدر أعرض فيه اللى بكتبه بحرية


اجمل كلمه اتقالت في وصف مدونتك.....؟



كل الكلام اللى اتقال عنها انا بقف عاجزة قدامه عن الرد والشكر

الحــمد لله


أهمية التعليق بالنسبه ليك ؟



التعليق بيكمل موضوعى بيكمل سطورى زى كلمة النهاية او الخاتمة بتاعة أى موضوع


احسن بوست كتبته ....؟



كل بوست بكتبه فى وقته بحس انه أحسن بوست كتبته


افضل بوست قرأته ...؟



بلاش أحدد عشان منساش حد بس أقدر أقول ان اصدقائى فى التدوين اللى متابعاهم هما اكيد عارفين نفسهم

انا بجد بحب كتاباتهم جدا




الشغل بالنسبالك ايه ؟



الشغل هو كيان الانسان هو اللى بيشكل ذاته وأعظم تجربة الانسان بيمر بيها خصوصا لما يكون مجال بيحبه





النت بالنسبالك ايه ؟



وسيلة بقدر احقق من خلالها غاية أكبر منها بكتير


تمرر التاج لمين...؟



لأى حد عايزه ههههههههه


الحقيقة مش عايزة أورط حد



بس ممكن أقول حبيبة قلبى غرووب لأنى أحب أعرفها اكتر

وده لو هى حابة تاخده





عارفة انى طولت عليكم بس حبيت أتكلم فى حيز اكبر شوية من المسموح بيه لأن الموضوع ده للتعرف على شخصيتى ولو إن ده صعب من خلال الكلمات



مش عايزة أثقل عليكم فى التعليق


وإن شاء الله بكرة هيكون فيه موضوع جديد



تحيــاتى لكل من زارنى وشغل باله بالرغى بتاعى

**************************************


30 التعليقات:



MǿиY El-Shreef يقول...

عااااااااا

يالهوي ع الريدر والله العظييييييييم

وربنا المعبووود ماجابش اي سيرة عن البوست ده الا دلوقتي

في حاجه غلط اليومين دوووول

سوري يانهاد :(

المهم نيجي للبوست

ماشاء الله فيكي حجات شبهي كتيييير

نفسي ابقى صحفيه كده وخصوصا اني بحب حجات كتير اوي من الي انتي كتباهم

حلــم إنى ألف الدنيا كلها من شرقها لغربها وشمالها وجنوبها

ومش بر ولا جو لأ


على متن سفينة فى البحر

الا ديىىىىىىىىى

ياااا ماقولكيش اد ايه بكره السفر بحرا

ربنا يبعدنا عن شره

مستنيين جديدك يا اكتر شخصيه رومانسيه قابلتها

ممموووواه

aidy يقول...

mony el sherief
*****************

اد ايه بفرح بتعليقك وبستناه من البوست للبوست

بجد يا مونى انا مبسوطة ان فيه حاجات مشتركة بينا دى ممكن تكون بداية لصداقة

أما بخصوص البحر فده عشقى الاول والاخير

أنا بريمو فى السباحة يا بنتى وكنت بدخل فيها مسابقات وانا صغيرة

وحلم حياتى انى اشترى فى يوم من الايام يخت اقدر الف بيه العالم

جربى ومش هتندمى :D

على العموم يا جميلة بجد نورتينى

وأسعدتينى

سلاااااااااااام

شاب كــ طخين ـــــا يقول...

اجاباتك جميله يا نهاد
ويارب ابقى صحفى زيك شكلنا كلنا هنفتح سوبر ماركت :D
ربنا معاكى وتحققى حلمك

aidy يقول...

امبارح كان عمرى عشرين

***********************

أهلا بيك فى السوبر ماركت :D

اكيد الصحافة هتنور بوجودنا :))

انا بجد متشكرة على متابعتك ليا وتعليقاتك

ومنتظرة تكرار الزيارة تانى

تحيــــــــــاتى

Unknown يقول...

اول زياره ومش هتكون الاخيره

اسلوبك جميل جدا


ربنا يوفقك و يحققلك امنياتك

امين



امضاء : احمد فؤاد

aidy يقول...

ahmadfd_2010
*************

اهلا بيك منور المدونة يا احمد ومنورنى

شكرا على الزيارة الكريمة دى وعلى التعليق

وبتمنى تتكرر الزيارة تانى

تحياتى ,,

صوت من مصر يقول...

شخصيتك نوعها ايه n 95 ليه
السؤال بيقول حدد صفه تدل على شخصيتك ؟ مفيها مشكله
عموما اجاباتك حاوه مووووت

aidy يقول...

صوت من مصر

*************

انا اللى لقيته بيقول شخصيتك نوعها ايه ؟

اكيد مش شخصية نرجسية سيكوباتية معقدة :D

على العموم تقدروا تحللوا الشخصية براحتكم ولما تلاقوا نوع محدد ابقوا قولولى هههههه

تحياتى ليك وشكرا لزيارتك ليا ومتابعتك مدونتى

mohamed ghalia يقول...

جميلة أوى إجاباتك وعرفتنا بيكى أكتر
ربنا يسعدك دوما

وحي القلم يقول...

اجابتك ممتازة جدا علي الريبورتاج ده
وعحباني اوي فكرة التاج ده
بس انتي قولت ف البداية جمعوا صورة كاملة عن شخصيتى

تكسبوا التاج ده
علشان كده هاحب أمارس هوايتي في تحليل الشخصية وأقولك اللي وصلي من تحليل شخصية حضرتك
( بدون زعل )
***************

حضرتك مش بتحبي اللف والدوران ، تحبي تكون صريحة
رومانسية حبتين ، طموحاتك ملهاش سقف
بتحبي النجاح وبتسعي اليه بكل طاقتك ، ومش بتحبي تضيعي وقتك .
غامضة شوية ، ومش عايزة الناس تعرف بعض الجوانب في شخصيتك
رقيقة الطباع ، مرحة وبتحاولي تخرجي من المأزق من غير ما تزعلي حد
أصحابك اللي ع النت أهم اصحاب ليك ، يمكن بتحبييهم أكتر شوية من أصحابك العاديين
بتحبي نفسك ومع ذلك حاسه انك مقصرة دايما وانك ممكن تعملي أحسن من كده
مش بتندمي ع اللي عاملتيه ، بس بتحاولي تطوري من نفسك
مودك دايما متغير مبسوطة ساعات وساعات تانية مخنوقة
الحياة العملية بالنسبة لك أهم حاجة عندك ويمكن السبب في ده طموحاتك العالية
وفي حاجات تانية بس بالنسبة غامضة ، وحاجات لو قلتها ممكن تسبب زعل
فكفاية لحد كده
تقبلي تحياتي
-----
وأسعد بكي زائرة دائمة لوحي القلم
--
ملحوظة : أنا حلم حياتي أكون صحفي ادع لي

aidy يقول...

mohammed ghalia
*****************

نورتنى وأسعدنى تعرفكم عليا أكتر

وشكرا لزيارة حضرتك ,,

aidy يقول...

مصعب صلاح

************

من اول ما دخلت مدونتك وانا بقول انك كلامك وشخصيتك اكبر من سنك بكتير إستحالة التعليق ده من شاب عنده 15 سنة بجد مبسوطة بيك جدا

وتسمحلى ابقى زى اختك الكبيرة ويشرفنى انك تكون اخ صغير ليا بجد

بالنسبة لتحليلك شخصيتى الى حد كبير صح

انت متنفعش تبقى صحفى بس لأ تنفع اوى فى اى مجال بيستخدم علم النفس

وبما إنك جمعت صور عن شخصيتى تسمحلى بقى أهديك التاج ده

وإعتبر نفسك من دلوقتى متورط رسمى ولازم تجاوب عليه

اما بقى لو فيه حاجات تانية عايز تقولها عنى اتفضل انا مش بزعل وكمان هناقشها معاك

تحياتى ليك,,

وحي القلم يقول...

يسعدني جدا كلمات حضرتك وانا ما استهلش كل الكلام ده
ويسعدني أكتر انك تقبليني أخ أصغر ليكي
الموضوع ده احسن خبر سمعته
--------------
بالنسبة لموضوع التاج لو عايز حضرتك تبعتيه أنا موافق
تقبلي تحياتي
أخوكي الاصغر اللي بيتشرف بأنه يكون كده
مصعب صلاح

الشاعر الحزين يقول...

ايه يا ستى الكلام الجميل ده ؟

تعرفى

أنا وأنا بقرأ حسيت انى
قاعد على الأرض فى بيتنا القديم
وقدامى الشموع منوره
وعبد الحليم بيغنى فى الراديو
والجو بيمطر فى الشارع
واحنا بنتدفى على ضوء الشموع

تعرفى

حسيت بالأصاله فى كلماتك

بجد شئ جميل قوى

أتمنى يكون احساسى وصلك

ولكى منى كل التحيه والتقدير

حزيــــــــــــــــــن يقول...

تشرفنا بمعرفتك

احمد مهنى

رؤية يقول...

تاجك جمييل
يستحق ان يكون تاج بالفعل...!
تلقائية
ودمك خفيف

تحياتى لك

Rania Lelah يقول...

بجد و الله دمك زى العسل بجد
اجاباتك عسوله خالص خالص
و يا رب تحققى كل الى بتحلمى بيه و تطلعى بطاقه رقم قومى لمدونتك كمان
و هتقوليلى على محشى ورق العنب و المحشيات بانواعها و اختلاف طوائفها دى عشقى الاول يا بنتى
:)

بس خلاصصصصصصص

aidy يقول...

مصعب صلاح
*************

أهلا مصعب نورتنى لتانى مرة

بخصوص موضوع الاخوة انت اكيد بقيت اخ صغير ليا

اما بخصوص التاج تقدر تعمل كوبى وباست للأسئلة لأنى عملت كده

ولو عايزنى اكتبهالك فى مشاركة عندك اوكى لنى مش هينفع ابعتها

اختك الكبيرة : نهاد

aidy يقول...

الشاعر الحزين

*************

ايه بس الكلام الجميل ده كله

أخجلتم تواضعنا

بجد انا مش عارفة اقولك غير ان كلماتك اكيد احسن من ردودى

تحياتى ليك,,

aidy يقول...

حزيـــــــــن

******************

شرفنى التعرف بحضرتك

واتمنى تكرار الزيارة

تحياتى

aidy يقول...

رؤية

********

شرفتينى بجد ونورتينى
وشكرا على المدح ده بجد مش عارفة ارد عليكم

من بعض ما عندكم اكيد

تحياتى ليكى يا قمر,,

aidy يقول...

Rania
*****

بجد متتصوريش ببقى فرحانى اد ايه لما بشوف ردود ليكى واحس ان فيه تواصل معاكى

بجد منورانى

وشكرا يا جميلة على كلماتك دى

وطبعا المحشيات دى لا تقاوم إسئلى اى حد هههههههههه

مستنياكى تانى

سلام

aidy يقول...

شكرا يا جماعة لكل اللى زارونى وشغل دماغه برغيى ده

ومنتظراكم فى موضوعى الجديد

تحياتى للجميع

وبتمنى انى اكون ضيفة خفيفة عليكم

assafo anaroze يقول...

سيدتي
يشرفني في البداية زيارتك لمدونتي
ثانيا انا سعيد بتعرفي اليمو عليك من خلال التاج
مودتي
اتمنى دوام التواصل

aidy يقول...

assafo anaroze
***************

اهلا بيك اولا

ثانيا انا يشرفنى زيارتك لمدونتى

نورت الموضوع وشكرا لعى التعليق الجميل ده

تحياتى لحضرتك ,,

غير معرف يقول...

البوووووست جميل جدا

وعرفنا على شخصية جميلة ورقيقة اووووووي

سعيدة بمعرفتك يالغلاا

ربنا يوفقك ويحققلك كل احلامك

aidy يقول...

نوارة

*********

أهلا بيكى يا قمر فى المدونة

دى اول مرة تشرفينى

انا اللى سعيدة بتشريفك ليا

ويارب تعجبك المدونة

وتسعدينى بتكرار الزيارة تانى

تحياتى

ذو الوجه المبتسم يقول...

- بعشق الورقة والقلم ومكدبش لو قلت إنهم أصدقائى المقربين منى جدا جدا

بعشق فن الكتابة بعشق أعزف بقلمى لحن أنا حباه وإحساس أكون حاسة بيه

- بحب الرســـــــم جدا ده تسليتى الوحيدة وبحس انه هو والكتابة وجهين لعملة واحدة

- انا بكره الكره نفسه .. عشان كده مكنتش لاقية اجابة للسؤال ده وأفتكر ان الحاجات اللى مش بحبها مش كتير

الاخت نهاد
بصراحة اجاباتك كلها معبرة عن شخصيتك المتزنة والعفوية
انا اخترت الحاجات البسيطة دى لانها تشبهنى كتير
واعتقد لو انا اتسالت الاسئلة دى اكيد مش هيكون غير نفس الرد بتاعك ده

تقبلى تحياتى

aidy يقول...

ذو الوجه المبتسم
**************

أولا اهلا بحضرتك نورت البلوج

وشكرا على تعليق حضرتك المميز

وبتمنى تكرار الزيارة

تحياتى

Hesham يقول...

عزيزتى نهاد معلش بدون القاب يعنى يمكن عامل اعتبار انى اكبر منك شويه سنا طبعا (شوية كتير انا 46 سنه ) ويمكن لانى حسيت لما قريت كرسى الإعتراف حسيت انى اعرفك من زماااان ولو ان زمان دى يعنى اعرفك وانتى يادوب 3 سنين بس بجد اسلوبك جميل جدا فى الكتابه يحسس الواحد فعلا انه قاعد معاكى بيسمع صوتك مش بيقرأ كتابتك ودا احساس بانك باذن الله ستكونين ذات شأن عظيم فى عالم الأدب والصحافة باذن الله ولكن نصيحتى لك وانت لسه فى بداية الطريق ان لاتكتفى بالتدوين فى المدونه انا اعلم ان الموضوع صعب ومحتاج واسطه بس انتى لسه الطريق امامك حاربى على فرصتك قاتلى لتحصلى عليها فانت كاتبه مبشره وان شاء الله ان وجدت لكى كتابات فى الصحافة ساعتهابس حأشعر ان هناك امل فى الإصلاح او فى غد مشرق يحصل فيه على الفرصة من يستحقها عموما قاتلى وحاولى الحصول على فرصتك فمن فى مثل سنى ويهوى الكتابه حارب كثيرا دون فائده قاتلت كثيرا ولكن قدر الله ماشاء فعل فاصبح التدوين هو وسيلتى الوحده فماعاد فى العمر الكثير لاحارب مرة اخرى اما انت فقلوبنا معك ان شاء الله فانت ومن هم مثلك امل جيل الوسط امثالى فى رؤية بوادر الأصلاح ورؤية امل فى مصر قبل ان نترك فوق ارضها وننتقل الى ماتحتها