ذكريات عشنا فيها دوبنا فيها من العذاب
ذكريات باقية فينا من ماضينا ليه سراب
************************
إسمحولى ان الموضوع النهاردة يكون مختلف
يكون ذكريات بجد من حياتى
مش خواطر ولا خيال
ولا ذكريات حب لأنى لسة معشتوش
لكنها ذكريات خفيفة على قلبى وليها مناسبة
انا أول بنوتة حفيدة فى عيلة مامتى وده خلى ليا مكانة مميزة أوى هناك
وإهتمام ملحوظ
كمان أنا كنت أول إبنة إبن فى عيلة بابا وأعز الولد ولد الولد :D
بس بجد ده خلانى مش مدلعة بس لقيت اهتمام من كل العيلة مش أسرتى الصغيرة وبس
النهاردة مش هقولكوا حكايتى مع العيلة كلها
لكنى هقول ذكرياتى مع شخصية واحدة من العيلة (( عمتي ))
أو بمعنى أصح الحد اللى ربانى مع بابايا ومامتى اللى سهر عليا معاهم
وياما دلعتنى وكنت بقعد فى بيتها أكتر ما بقعد فى بيتنا واللى ساعدنى على كده
إننا جيران هههههههههه يعنى ليل ونهار عندها
ولادها بقوا إخواتى وهى بقت أمى التانية بدون أى مجاملة
أفتكر مرة وانا عندى تلت سنين زعلونى فى البيت
لميت هدومى فى كيس الخضار :D
وسيبت البيت وروحت لعمتى ويوميها كنت هاخد عقاب كبير لولاها اللى قعدت تضحك لما دخلت عليها بشنطة هدومى طبعا كنت طفلة شقية .. عارفة هههههه
أما بقي فى يوم ما كانوا يطلبوا منى انزل اشترى طلبات وانا مليش مزاج
كنت اروح عندها وكان جوز عمتى هو اللى بيشترى الطلبات وانا اقعد اهرج واضحك معاهم
وطبعا جوز عمتى مكنش بيكون مجبر على كده بس هو اب بجد ليا وكانوا مدلعنى أكتر من ماما وبابا
منساش أبدا لما كنت اسهر معاها لحد الفجر ونصلى سوى ونقعد ندردش فى البلكونة للصبح
وتقولى نسمه الفجرية دى أحلى نسمة فى اليوم كله
ولا أيام الثانوية العامة لما كنت أخاف أقعد يوم النتيجة فى البيت وملجأى الوحيد هو بيتها وحضنها وفريرة أخد بعضى من أول اليوم وأعسكر هناك هههههههه
ولا لما تعمل أكلة بحبها زى المحشى ولا المكرونة بالبشاميل وتتصل بيا تقولى تعالى عملالك الاكل اللى بتحبيه وانا اروح أرشق عندها ناكل ونهزر وفى اخر الليل بابا يجى يخدنى
ومنساش يوم بجد عيطت فيه بسببى :(
كنت كل عيد متعودة من وانا أد كدهو إنى أقوم بعد ما ارجع من صلاه العيد ألبس اللبس الجديد وأخبط عليها اصحيها من النوم وأدخل أقعد أعاكس فيها وناكل ترمس وكحك مع بعض لما نقول يا بس
بس يوميها كنت كبرت بقى وبقيت فى ثانوى مش معقول هعمل زى العيال والبس اللبس الجديد عشان تشوفه عليا واروح من الصبح
فى اليوم ده إتصلت ببابا تعيطله وتقوله انى مبقتش احبها زى الاول ازاى يعدى يوم زى ده وأخلف عادتى معاها و اروح وتعيد عليا
بس والله مكنش قصدى انا بس كنت حاسة انى كبرت يا عمتو ومينفعش يعنى اتصرف تصرفات اطفال كده انتى عارفة البنات بقي ههههههه
كان يكفيها انى اروح وأعيط وهى تاخدنى فى حضنها ياااااااه
ايه الحضن الدافى ده .. ايه الحنية دى كلها ده هى اللى علمتنى الحب والحنية
لما دخلت الجامعة مبقتش اروح زى الاول ولادها اللى من سنى أتجوزوا وبقيت اقعد فى البيت وخلاص عاتبتنى كتير وكنت بروح وأرجع أقطع تانى
بس بجد سامحينى الدنيا خدتنى بعيد عنك يا أمى انا عارفة ان عتابك حب وانا والله بحبك وبموت فيكى
وبعد طول غياب حوالى شهر اتصلوا بيا أولادها إلحقينا إندهى خالى
((ماما بتمـــــــــــــــوت ))
لو أوصفلكوا الشعور اللى حسيته ساعتها مش هتصدقونى ..روحى كانت بتطلع معاها
جريت فى الشارع وانا مبهدلة وبدخل عمارتها اللى جنبنا
صوت صويــــــت
جريـــــــــــت على أوضتها (( ردى عليا يا حبيبتى متسيبينيش ))
مكنتش بترد عليا اترميت فى حضنها فى نفس فى نبض
دكتوورررررر بس الدكتور مجاش قالهم السلم عالى مش هقدر أطلع انقلوها اى مستشفى
بس المستشفى بعيد وهى بتموت إنجدنا
رفــــــــــــــــض
ماتت قدام عنيا شوفت روحها بتطلع مقدرتش أساعدها
كان أول مرة حد يموت عزيز عليا
كان أول مرة أفقد حد وأشوفه بيموت قدام عنيا بيتألم مش قادرة أنجده
كانت أول مرة اشوفها بعد شهر
الله يرحمك يا حبييتى
يا ترى سامحتينى ولا متى زعلانة منى
السنة دى فى عيد ميلادى محدش اتصل بيا بالليل عشان يهزر معايا ويدلعنى
محدش إفتكرنى
عشان محدش زيك
فات سنة معقولة دى واليوم ده الذكرى السنوية الله يرحمك يا عمومة زى ما كنتى بتحبى أندهلك
إقرولها الفاتحة والدعاء أرجوكم
***********************************
66 التعليقات:
أول تعليق ، المفروض أخد جايزة عن موضوع أول تعليق ده
حلو أوي ان الواحد يفتكر ذكرياته أيام زمان
والله يرحم الجميع
لو لكي ميل ع الياهو ياريت تبعتيه ليا
عايز أقولك حاجة سر
أهلا مصعب منورنى دايما
لو عايز جايز نقى اى حاجة من المدونة وخدها بس بلاش الكلام هههههههههههههه
ربنا يرحم أمواتنا يارب
بس انا مش هقدر أبعت ميلى على الملأ كده ههههههههه
لو ينفع تتقال على الهوا إتفضل ههههههههههه
خليتيني اعيط يانهاد :(
ربنا يرحمها يااارب
الدنيا دي وحشه اوي بتاخدنا كده من بعضنا من غير مانحس
ومش بنعرف قيمه الحاجه الا لما نفقدها
ربنا يرحمها ويتولاها برحمته
بس بجد غاظني الدكتور ده اوووي :(
ربنا يرحمها ياحبيبتي
عيد ميلاد سعيد
وكل سنه وانتى طيبه
على فكره انا لسه سامع اغنيه ذكريات النهارده بجد
كل سنه وانتى طيبه
مش عارف ليه انا بعرف ناس كتير مواليد شهر 4
الله يرحمها ويغفر لها ويسكنها فسيح جناته
mony el sherief
*****************
انا اصلى كتبت البوست ده وانا بعيط يا مونى
ولسة واخدة بالى انه طويل
بجد مفتقداها اوى
ربنا يرحمها و يتولاها برحمته يارب
والدكتور ده بجد كان نفسي أخنقه ساعتها لما قال لبابا كده ربنا يسامحه بقي
وشكرا يا مونى انتى رقيقة عشان كده أثرت فيكى كلماتى
السلام عليكم
أذيك يانهاد
ربنا يرحمها ويدخلها فسيح جناته
وجزاك الله كل الخير ويارب يبارك فيكى
تقبلى أحترامى وتحياتى
أختك إيناس
بحبك قوووى
صوت من مصر
***************
واضح انك مقريتش الموضوع
ده مش عيد ميلاد دى حالة وفاه
وبجد انا كنت عيط و لما قريت عيد سعيد ضحكت
صح النوم هههههههههههههههههه
mohammed ghalia
**************
آآآآمين يارب العالمين
ويرحم موتانا جميعاً
تحياتى ليك وشكرا على تواصلك الدائم
عاشقة الأحزان
******************
وعليكم السلام ورحمة الله وبركاته
انا كويسة يا جميلة الحمد لله
ويارب يرحم موتانا جميعا آآآآمين
وبجد شكرا على تعليقك الرقيق ده
ووالله بجد انا بحبك فى الله
تحياتى ليكى
نهاد
ربنا يرحمها
ويصبرك
أهـــــــــلاوية
*******************
اللهم آميــــــــــــن
متشكرة عن الزيارة ويارب تتكرر تانى
تحياتى ليكى ..
ربنا معاكى يا نهاد بجد هو احساس فظيع
خصوصا لوحد زى ما وصفتى عمتك
ربنا يرحمها ويسكنها فسيح جناته
إمبارح كان عمرى عشرين
*******************
شكرا ليك يا محمود على التعليق ربنا معانا كلنا
انا وصفتها اه بس ده لسة موفهاش حقها وأقل من اللى كان بيحصل
ربنا يرحمنا موتانا وموتى المسلمين
تحياتى ,,
أحب بلوق الخاص بك
بصي يا استاذة نهاد
أنا ميلي ع الياهو أهو
mosabbslah@yahoo.com
لو حبه تضيفي ميلي عندك لك مطلق الحربة
أصل أنا عايز أكلمك ف موضوع ماينفعش أقوله ع الهوا كده
ولو مضفتيهوش عادي أنا مش هازعل
وبعدين دا موضوع أخوي ما يتقلش ع الملأ
تقبلي تحياتي
عايز الجايزة بتاعة أول تعليق
ياااه يا نهاد قد ايه قلبتى عليه المواجع
ربنا يرحمها برحمته واكيد هى مسمحاكى
ومش زعلانة منك لانها بتحبك قوى
ومقدرة قد ايه غصب عنك
انك بعدتى ربنا يرحمها ويتغمدها برحمته
ادعيلها دايما
smilyrose
وردشان
روح الحب الصادق
ربنا يرحمها برحمته
ويرحم جميع اموات المسلمين
امين يارب العالمين
بصى يا حبيبتى انا شايفه انك
مشيله نفسك ذنب انك مقدرتيش تتصرفى بس الحقيقه لو كنتى عرفتى تعملى حاجه كان بردو ربنا هيفتكرها لانه بكلا بساطه تعددت الاسباب والموت واحد وهى يا حبيبتى مكتوب لها اليوم والساعه والثانيه دى ومش لوحدها كلنا مكتوب لنا قبل ما نتولد الساعه اللى هنموت فيها
ربنا يصبرك على فراقها لانى اصعب ما فى الموت الفراق ..عليكى بقراءة الفاتحه والدعاء لها بالرحمه دايما .....واسفه على الاطاله
تقبلى تحياتى ومرورىلاول مرة
وان شاء الله ليست تكون الاخيرة
عاشقه الاحزان
جوجو
ربنا يرحمها يارب
بكتينى يا نهاد والله
صعب جدا تشوفى حد بيتحبيه بيضيع منك فى لحظة وتحسى كمان انك كنتى مقصرة معاه
صحيح الدكتور مكانش هيقدم او يأخر عمرها بس موقف حقير جدا منه الحقيقة .. حسبى الله ونعم الوكيل فى الدكاترة اللى بالشكل ده
تعيشى وتفتكرى يا حبيبتى
رايي بمدونتك روعه تستحق الزياره
اتمني لك التقدم
واتمني لك زياره مدونتي ما تنسي وزيارتها دائما اوي
هههههههههههههههه
اه ياني
في شنطة الخضار
ديه اخرة الفرجه على افلام عربي كتير
بتهيالي كتير مننا حصلتله مواقف قريبه من مواقفك دي
ولما بيفتكرها بيضحك جدا
وعلى الرغم انها ممكن تكون محرجه
لكنها بتكون سعيده كذكريات
تحياتي
الله يرحمها
تصدقى وانا بقرا كلاماتك حاسس انى شايف الاحداث كلها قدامى
وحسيت قوى لما الروح بتطلع والنفس احساس صعب قوى
الله يرحمها
ويصبرك
فعلا انا علقت قبل ما انام على طول
اسف بجد بجد اسف
هى ساعات بنقول عليها ذكريات
بس هى فى الحقيقة
محطات رئيسيه فى الحياه
نستمد منها عبق ورائحة عندما نتذكرها نشعر انها كانت بالامس القريب
لاءنها حفرت فى الاذهان
رحم الله الام التى لم تلد ولكنها فى القلب هى الام
تحياتى
رحمها الله وجعل مثواها الجنة
دمتى رقيقة
تحياتى لك
♥♥♥♥♥ Jennifer™® ♥♥♥♥♥
**********************
أهلا بيكى نورتى البلوج :)
مصعب صلاح
***************
إن شاء الله اشوف موضوع الميل ده وأكلمك
وبخصوص الجايزة قول عايز ايه وانا اوديهولك لحد مدونتك ههههههههههههه
smilyrose
**************
ربنا يرحم أمواتنا جميعا ويارب تكون فعلا مش زعلانة منى
انا بدعيلها واكيد بيوصل وأكيد عارفة مدى حبى ليها
شكرا لمشاركتك الرقيقة دى بجد
تحياتى ليكى
gogo!sf
*************
آمين يارب العالمين
بجد متشكرة اولا على زيارتك لمدونتى وعلى تعليقك الجميل جدا ده
انا عارفة إن لكل أجل كتاب
بس الفراق صعب جدا
وعارفة ان مساعدتى مكنتش هتغير حاجة
بس على الاقل كنت هحس انى عملت حاجة
ربنا يصبرنى ويصبر أولادها
ويستجيب الدعاء مننا
شكرا يا حبيبتى على مشاركتك بجد
حاجات جوايا
*****************
آمين يا سالى يارب يرحمها ويرحم موتانا جميعا
انا اسفة انى بكيتك بس ده لأن المشاعر الرقيقة بس هى اللى تتأثر باحزان الاخرين
وبجد دى كانت أصعب لحظة فى حياتى حسيت فيها انى عاجزة وانى قليلة الحيلة وان حاجة مهمة فى حياتى بتروح منى بس ربنا يقدرنى على النسيان
هما بيقولوا النسيان نعمة بس للى يعرف
فات سنة ولسة منسيتهاش وكل يوم بحاول ادعيلها قبل ما انام بدل العياط
والدكتور ده حسبى الله ونعم الوكيل لأنه رفض مساعدة انسان وده ضد القسم اللى هو حلفه يوم ما اتخرج
ربنا يسامحه ويقدره انه يساعد غيره لأن دى مقدرة مش عند اى حد
شكرا يا سالى على تعليقك اللى لمسنى بجد اوى
امنيتى
**********
شكرا يا حبيبتى على الزيارة
وان شاء الله اردهالك
تحياتى
مذكرات مشاغب
****************
أدى واحد تانى مقراش الموضوع لحد الاخر وقف عند شنطة الخضار وسكت ههههههههههههه
ده مش موضوع ذكريات سعيدة
ده موضوع ذكرى سنوية (( يعنى ذكرة مؤلمة ))
مش كل الذكريات بتضحكنا فى ذكريات بتبكينا
شكرا على زيارتك بس واضح ان موضوعى فخ للى ميقراش للآخر
romansy
***********
شكرا اولا على تكرار زيارتك وعلى انفعالك مع الموضوع بتاعى وتأثرك
ربنا يرحمها ويجعل مثواها الجنة ...آمين
صوت من مصر
****************
متتأسفش انا مش زعلانة
بس بجد مشاركتك حولتنى من حالة لحالة تانية خالص
كنت بعيط ومتأثرة وفجأة لقونى فى البيت بضحك بدون سبب
شكرا على الضحكة دى ولو إنك مكنتش قاصدها
abo ali
***********
هى فعلا محطات ولازم نمر بيها والاستمرار للاقوى
وللأسف إشك انى قوية فى انى استحمل محطة تانية زى دى
ربنا يرحمها ويرحم موتانا جميعا يارب
وشكرا بجد على المشاركة المتميزة دى
تحياتى
رؤية
************
آمين يارب ويرحم أمواتنا جميعا
شكرا ليكى انتى على مشاركتك الرقيقة دى
تحياتى
نهاد أنا قرأت البوست ده
انهارده وامبارح وأول امبارح
أول امبارح مكنتش قادر أكتب تعليق
امبارح حسيت انى مش عارف أكتب تعليق
انهارده حسيت انى لازم أكتب تعليق
لكن هتصدقينى لو قلتلك
انى فى المواقف دى مش بعرف أتكلم
بس أنا عارف ان احساسى أكيد وصلك
وهو ده المهم
وبعتذر على عدم قدرتى على التعليق وعلى التأخير فى التعليق
ولكى خالص عزائى
ورحم الله الجميع
تحياتى
الشاعر الحزين
****************
كفاية انك بجد تعبت نفسك وقريت وإتأثرت ده فى حد ذاته يدل على شخصيتك الجميلة
شكرا ليك بجد ودى حاجة انا اللى أعتزر عنها انى نكدت عليكوا
وربنا يرحم موتانا يارب ...
جعل الله مثواها الجنه ورحمها
بجد اد ايه المواقف دى بتكون صعبه
بجد انا بعتزر على عدم مجيأى ولكن والله كان فى ظروف وعدت الحمد لله
رحمها الله
لا يوجد في الخلق من هو أحن عليها من الخالق
ولا يوجد في الكون من سيحتويها كما سيحتويها وحده
هي الآن في رحابه...لا تحتاج منا سوى الدعاء
الحارة سد
لا حول ولا قوة إلا بالله العلي العظيم
يااااااااااه يا إيدي انتي حكيتي عن إنسانة قريبة منك وماتت قدامك وانا كمان من اسبوعين اتعرضت لنفس التجربة المؤلمة دي
أثناء قرائتي لذكرياتك مع عمتك الحبيبة كنت سعيدة بتفاصيل هذه الذكريات والعاطفة الرقيقة المسيطرة عليها
لكن كان جوايا خوف انك تكتبي إن الست الجميلة دي ماتت
ولما قريت دموعي اتجمعت في عيوني
ربنا يصبرك يا حبيبتي لأني عرفت وبعد تجربة إن فيه فرق فظيع بين إننا نسمع إن شخص مات وإننا نشوف الشخص ده بيموت وتنتهي رحلته مع الحياه قدام عيوننا وبين إيدينا وخصوصا لو كان غالي علينا
إدعي ليها دائما بالرحمة يا حبيبتي وكمان تصدقي على روحها ولو حتى وانتي ماشية بالشارع ولو حتى بمبلغ بسيط
أنا اتعرضت للتجربة دي مع بنت عمتي وكتبت عنها موضوع رحلتها من الحياة إلى الموت في 8 ساعات
هتلاقيه في مدونتي بنات أفكاري على اللينك ده
http://banatafkarie.blogspot.com/
على فكرة عايزة أقولك للمرة التانية وبعيدا عن موضوعك الحزين إنك فعلا مبدعة في نقل المواقف ووصفها سواء مواقف حقيقية أو تخيلية وخليتيني أعيش معاكي ذكرياتك مع عمتك
ربنا يبعد عننا الحزن ويفرح قلوبنا أحسن الأيام دي الحزن بقى كتير قوي يا إيدي
تقبلي مروري وخالص مودتي وتحياتي
إنا لله وإنا إليه راجعون
البقاء لله .. ودمت وفيه دائما لذكراها
ربنا يرحمها ويصبرك ويسعد ايامك يارب
ويزيل عنك الهم وانشالله تجتمعو بالجنان انشاء الله
اجمعين
شكرا اختي ربنايوفقك
بس سؤال
انتي بتضحكي عليا فين الزياره لمدونتي
انا زعلان
بدك تراضيني ازاي انا عندي حل
هههههههههههههههههه
اي هوا
فكري
فكري تاني
سعادتك
ادم المصرى
*************
ربنا يستجيب منك ويرحم موتانا جميعا ً
وحمد الله على سلامتك ويارب تنورنا بتعليقاتك ومواضيعك مرة تانية
تحياتى
الحارة سد
**************
أولا اهلا وسهلا
ربنا يرحم موتانا جميعا ويلهمنا الصبر
شكرا على الزيارة واتمنى تكرارها
ELMASRYA - MRS WRITER
***************************
اسفة انى قلبت عليكى المواجع أنا عارفة مقدار الحزن اللى اكيد انتى فيه
ومتوقعة الحزن بيكون شكله عامل ازاى جواكى
انا لما حبيت أكتب عن عمتى حبيت اكتب ذكرياتى معاها الاول لن ده هيوضح مدى ارتباطى بيها وهيوضح اكتر حزنى عليها لأنه مش مجرد موضوع للحداد او للذكرى السنوية وبس
وقصدت اخلى الموت فى النهاية عشان ده اللى حصل فعلا الذكريات فى الاول بتحصل وبعدين النهاية المؤلمة
أصعب شئ احساسك وانتى عاجزة والشخص ده بيموت قدامك أد ايه بتحسي انك ضعيفة اوى
ده كان اصعب احساس عاصرته بجد
وأكيد انتى كمان كان اصعب احساس عاصرتيه مع بنت عمتك انا هدخل واقرا موضوعك انا كمان عارفة مقدار الالم اثناء كتابة الذكريات دى بيكون عالم ازاى
ربنا يرحم موتانا جميعاً يارب
وشكرا يا حبيبتى على الكلام اللى قولتيه فى حقى
انا كتبت بتلقائية حتى معرفش شكل الكتابة طلع ازاى
بس الاحساس الصادق هو اللى بيأثر ويوصل من القلب للقلب
شكرا بجد على زيارتك اللى اسعدتنى وكلامك الجميل اللى حبيته وانا بقراه
وان شاء الله يكون فى بينا تواصل
تحياتى ليكى
يا مراكبــــــى
**************
اهلا بحضرتك
ونعم بالله ربنا يرحم موتانا جميعا
وشكرا على التعليق والزيارة
تحياتى لحضرتك
امنيتى
**********
أهلا بحضرتك
انا مش بضحك عليك ولا حاجة انا بس نفسيتى تعبانة شوية فامبارح والنهاردة مكنتش قادرة اشارك
ان شاء الله هشارك فى مدوناتكم كلكم
بس افوق شوية
تحياتى ,,
السلام عليكم
جميل ان تفضلى فكره الزكريات
ووفيه لاصحابها
ربنا يرحم عمتك ويسكنها فسيح جناته
abo 7anf
**********
وعليكم السلام وحمة الله وبركاته
لما يكونوا أصحاب ذكرياتك هما أعز الناس
بيجبروك انك تكون وفى لذكراهم
ربنا يرحم جميع موتانا يارب
اللهم آميـــــــــــــن
بجد وجعتيلي قلبي
وفكرتينى بتيته الله يرحمها كانت نفس الشئ
الله يرحمهم جميعا
ازيك يا هايدى
تحياتى
عمتك كانت ست طيبه وبتحب اهلها ودا مش غريب علينا المصريين بنحب اهلنا بس فيه حاجات ساعات بتخبى الحب ده
الله يرجمها ويدخلها فسيح جناته
تعيشى وتفتكرى يا هايدى يا حلوه يا سكره
تحياتى
غروب
*********
انا اسفة يا حبيبتى انى قلبت عليكى المواجع بجد
بس انا حبيت زى ما بتشاركونى فى كتاباتى وافراحى انى لما ابكى واحزن تكونوا معايا مش عشان أزعلكوا بس عشان احس انكوا معايا
ربنا يرحم امواتنا كلنا
آمين يا رب
فشكول
**************
عم فشكول إزيك انا الحمد لله ماشي الحال
فعلا المصريين عم الناس اللى الواحد يحس فيهم بالاصالة بيحبوا بعض ومهما حصل من حاجات بتغلوش على الحب ده بس بيفضل جواهم
وبجد ربنا يخليك على الدعوة دى ربنا يستجيب ويرحمها
وشكرا على تعليق حضرتك اللى دايما بينورنى
تحياتى ,,
الله يرحمها ويسكنها فسيح جناته
انت عارفهانا ليه عمه كده انا وهي كنا كده بنحب بعض جدا جدا
لما ماتت اناانهرت عشان هي القلب كله
كنت دايما اقول امي هي امي العقل وعمتي هي امي القلب
شمس النهار
**************
إزيك يا حبيبتى فرحت بتعليقك اوى حسيت انك حاسة بيا
بس انا جايز كنت مدلعة من الكل ماما وعمتى وخالتى عشان كنت البنت الحيلة فى الوقت ده
فأنهارت لما فقدت حد منهم ومفتكرش هقدر استحمل فقدان حد تانى
جدار قلبى ميستحملش أكتر من كده
الله يرحمها يا رب
القصة اثرت فيا
تقبلي مروري
s h a h
************
اهلا بحضرتك
ربنا يرحم اموتنا واموات المسلمين
هى القصة مجرد ذكرى بحياتى
وسعيدة انها أثرت فيكم
تحياتى
ازيك يا نهاد يا حلوه
صورتك زى القمر يا نهاد .. تصورى جيت عندك كتير واول مره اخد بالى من الصوره
اشكرك يا نهاد على الزياره ونورتينى وبتشرفينى دايما فى فشكول
اعزك الله
السلام عليكم
زيارتي دي مش تصفح للمدونة أو قراءة لموضوع وتعليق عليه لا دي زيارة مختلفة جدا أنا يشرفني إني أدعو حضرتك للمشاركة والكتابة معانا في مجلة رؤية مصرية يمكن يحالفك الحظ وتكوني أحد أعضاء فريق التحرير
العدد الجديد الرابع يعني هيصد بعد بكرة يعني فجر السبت لو هتقدري تشاركينا ابعتي دلوقتي على بريد المجلة رسالة تأكيدية وجهزي مشاركتك وابعتها بردو على بريد المجلة بس بسرعة عشان العدد بنبدأ شغل فيه يوم الجمعة بعد العشاء .. منتظر الرد والمشاركة
ودمتي بود
لينك المجلة
http://roayahmg.blogspot.com/
بريد المجلة
ibrahemaladawy@gmail.com
رئيس التحرير
كاتب مصري
فشكول
*******
اهلا يا عم فشكول
انا كويسة الحمد لله
بس الصورة دى من على النت
وحضرتك متشكرنيش على الزيارة انا اللى أشكر حضرتك على المعلومات اللى بتزودنا بيه
لأن كل ما ادخل عند حضرتك بستفيد معلومة جديدة
أعزك الله
رئيس التحرير
*********
ان شاء الله احاول اشارك معاك فى المجلة بس الحقيقة انا معرفش معلومات كتير عنها يعنى بتكتب فى ايه وهكذا بس ممكن ان شاء الله اقوم بزيارتها واحاول اشارك العدد القادم
تحياتى
البوست يأثر فى اى حد فقد شخص عزيز عليه , المشكلة مش فى الموت الموت هو الحقيقة الوحيدة فى الحياة المشكلة ان فى حياتنا ناس من غيرهم ماتبقاش حياة و حتى لما يمتوا صعب نصدق بنعتقد انهم غايبين ولازم هايرجعوا ,
هايرجعوا لما نحتاج لهم زى ما كنا دايمن بلاقيهم جنبنا وهانروحلهم فى نفس المكان بتاعهم هنلاقيهم
مستنينا زى ما كانوا دايما بيستنونا
هايرجعوا لانهم مش ممكن هيسبنوا نتعب بعدهم
وبنفضل نصدق انهم راجعين لحد لما نفوق على الحقيقة
انهم ماتوا ومش راجعين
رحم الله عمتك واسكنها فسيح جناته والحمد لله انك لسه بتدعيلها علشان عملها ما ينقطع فى الدنيا
ربنا يرحمها ويرحم موتى المسلمين
-----
ربما تكون الذكريات أسعد ما في الحياة
واحيانا تكن سبباً لعكس ذلك - ربنا يعينك على فراقها
Inevitable
***************
التعليق بتاعك هو اللى بجد آثر فيا لأنه وصف جزء من حالتى فعلا
بجد شكرا على المشاركة الوجدانية دى
وشكرا على الدعاء ربنا يرحمها ويرحم موتانا جميعا و موتى المسلمين
تحياتى
محمد توك
*********
اهلا بحضرتك منور المدونة
شكرا على التعليق
وربنا يرحم موتانا و موتى المسلمين جميعا
تحياتى ,,
إرسال تعليق