شوية فضفضة


إزيكم كلكم


وحشتونى


انا وعدتكم ببونبوناية للى يحل الفزورة


بس محدش حلها


المكان ده عندنا فى حلوان


والشجر ده قدام بيتى بالظبط اول ما افتح البلكونة بلقيه قدامى


افتكر ان حلوان اكتر مكان فيه شجر ونخل عشان فيها مصانع كتيييييييير



سيبونا بقي من الفزورة


عشان عايزة اتكلم معاكوا


حسيت انى عايزة افضفض


الفترة القصيرة اللى فاتت مرت عليا فيها مواقف كتير


مخلية حالتى النفسي مش متظبطة


يوم الاقى نفسي حزينة لأبعد حد


و يوم الاقينى بقاوم واحس بحالة من الفرح والسعاده من غير اى سبب غير انى عايزة ابقى سعيدة حالا وخلاص


جايز لأنى مريت بكذا موقف صعب فى فترة قصيرة


بس انا مش من عادتى الاستسلام للحزن


لما بكون فى وسط ناس حتى اسرتى الصغيرة محدش فيهم بيحس حتى انى متضايقة


لأنى متعودة على الضحك والشقاوة والمقالب والهزار


وحتى وانا متضايقة بفضل بنفس اسلوبى ده عشان محدش يحس ولا حد يسألنى فيه ايه


بس بجد حسيت مرة واحدة انى اصبحت لوحدى بكل ما تعنيه كلمة وحدة من معنى


مفيش اصحاب


مفيش حد يعرف عنى اى حاجة غير أنا


كل اللى حواليا معارف مجرد معارف


حتى فى البيت انا وماما اصحاب اووووووووى بس مش بحب احكيلها انى متضايقة

لأنها بتخاف عليا زيادة عن اللزوم وكمان مبحبش اضايقها خصوصا انى عارفة ارتباطها بيا


فبالتدريج حسيت انى مفيش حد اتكلم معاه


حسيت انى لازم ارسم ضحكة على وشى حتى لو مش من جوة قلبى
لمجرد ان محدش يشعر انى متضايقة او حزينة


عارفة انى زهقتكم


بس كفاية عليكم كده انتوا مش ناقصين,,

45 التعليقات:



ABOALI يقول...

ايه يا ايدى ايه

ما هى حديقة الاورمان جنب حلوان
بس انتى بصى ناحية اليمين من البلكونة وانتى تلاقى الشجرتين عاليتين شامختين

بصى بعيون تانية
تلاقى الشجر فى كل مكان
بيروى فى احيان كتيره
ظمأ اى عطشان
ممكن يكون اوكسجين
ممكن يكون ظل وحنان
لكن فى كل الاحيان
شموخ وزينة ومقام
كل وقت وحين
بيعلمنا احنا البنى ادمين
اننا لازم يكون فينا الشموخ
ونظلله بحبة عطاء
ونستثمر حياتنا
علشان العنوان الاخير الفناء



الفضفضة بتاعتك يا ايدى

كلنا بنمر بيها
نتيجة قلة الاصدقاء وكثرة الزملاء
والصديق ده ليه دور كبير فى حياتنا لو ربنا وفقنا فيه
لاننا فى وقت من الاوقات محتاجين فضفضة وحد يكون مرايا لينا

علشان كده ابدئى واصنعى ليكى صديق
يكون ليكى باب ياءتى من خلاله هواء نقى مثل الشجر

طبعا فى الوقت اللى بتدورى على صديق
فيه غيرك بيدور
علشان كده كونى انتى للناس زاى ما انتى عاوزاهم يكونوا ليكى

ومش هاتعرفى تصنعى اصدقاء الا بزيادة الاحتكاك
وتجربة اللى انتى تتوسمى فيهم الصداقة فى حاجة صغيرة كانوع من الاختبار

وانا واثق انى لكل طير وليف
ولكل انسان اكيد صديق


سعيد جدا بفضفتك لاءنها معبرة عنا كلنا


مع شكرى

ABOALI يقول...

ثانى تعليق

شوية غتاتة

mohamed ghalia يقول...

الخوف والحرص مطلوبين لكن مش دايما
إحنا هنا أصدقائك ودايما هنسمعك
ولو طول العمر تانادى هتلقينا دايما جنبك
ها كملى وقولى كل إلى جواكى

ديالا يقول...

للاسفف انا لسه مشفتش حلوان

وبعدين انتي بقي اخدتي البونبانيه ولا لاا

وبعدين انتي تفضفضي براحتك وزي ماانتي عايزه

واحنا نسمعك ياقمر

صوت من مصر يقول...

هايدى
اولا اولا اولا
هو كل المدونين من حلوان ولا ايه
عموما مش مشكله على خط واحد يا ريسه
ثانيا انا مش عارف ليه يمتكلنى نفس الشعور وهو انى وحيد فى وجود بعض المعارف فقط حتى الصحاب اصبحت ابتعد عنهم
لكن اظل انا مثلك مهما تمر بى الاخزان اضحك واهزر واتكلم

Rosie يقول...

خلاص يا ايدى..هتخدى أنت لبونبوناية..بس الصراحة كان سؤال صعب..
الفضفضة
...بصى أولا الحالة دى ناس كتير بقت بتحس بيها إذا ما كانش كل الناس ( و انا اللى كنت فاكره نفسى لوحدى)..بس الغلط أنك تبانى مبسوطة و أنت زعلانة...لازم تفضفضى لحد..لازم متعذبيش نفسك برسم ضحكة لقلب مليان حزن..فضفضى بالحزن ده و اتخلصى منه و بالمرة من احساس الوحدة لأنى عارفة أنه احساس فى منتهى القسوة و بعدين اضحكى من قلبك و افرحى على الآخر...

Hesham يقول...

للأسف ياصديقتى احيانا لايشعر بالنفس الا النفس وبالتالى فالفضفضة للنفس علاج

reem يقول...

عزيزتي
دي اول زياره هنا
تعرفي حاجه مههما كانت شخصية الواحد فينا ومهما كان متفائل وعايش الحياه بالضحك والمزح والهزار لازم يمر باوقات يحس فيها انه مش عارف يفسر حالته ايه بالضبط مرات بيكون عاوز يضحك من غير سبب واوقات عاوز يعيط من غير سبب بيكون زهقان او حاسس بحالة ملل مش لاقي حد يسمعه يمكن ..
علشان كده دوري على صديق قريب جدا يكون منك تقدري تثقي فيه يسمعك من غير ما تتكلمي هو ده الي بيكون محتاجه يمكن والفضفضه هنا ممكن تريح النفس كمان
دمتي بحب

مصعب صلاح يقول...

السلام عليكم

نهود وصلت يا جماعة من حلوان

============
على فكرة دا مش فيه اي مشكلة

عادي جدا

أنا حصل لي نفس الشيء

اقبلي مروري

وبعدين احنا هنا عشان نسمعك

وبعدين مش أحنا اخوات

فضفضي براحتك

Sweet Violet يقول...

ايييييييييييييييييييييييييييييييييييييييييييييييه
انتى من حلوااااااااااااااااااااااااااااااان
!!!!!!!!!!!!!!
و المكان ده فى حلوان بجد ؟؟؟

احم احم عيب عليا على فكرة قوووى
بس يعنى انا بردو الكل عارف انى قاعدة فى حلوان منظر فقط لاغير
يعنى مش اعرف فيها قوى v_v

و كمان حلوان فى مصر يعنى انا قولت صح
هاتى البنبونى بقى بطلى طمع ×_×

اما الفضفضة و احساس الوحدة
امال يعنى احنا هنا دورنا ايه هه
صدعينا ولايهمك ياقمر .. هو فى حد بيعترض على قدره P:

جد بقى
الاحساس ده بيمر بيه اى انسان من وقت للتانى
ومش شرط يكون قلة الاصدقاء لا ممكن يحسه وهو وسط البشر

بجد لما تحسى الاحساس ده امسكى ورقة وقلم واكتبى اى حاجة المهم اكتبى اللى جواك
هترتاحى و الاحساس ده هيروح و هترجعى تضحكى بجد مش مجرد وش مبتسم
^_^

ضحكات الحياة يقول...

السلام عليكم

كل واحد لازم يفضفض و الا هينتهي بيه الأمر الي الجنون او على الاقل دي وجهه نظري

علي فكرة الفضفضة مع أي حد بتكون حلوة بس طبعا الشخص اللي الواحد يأتمنه

و كل واحد بيمر بنفس اللحظات سعادة من غير سبب و احيانا برده حزن من غير سبب

بس الواحد هيعمل ايه بقي دنياااااااااااااااااااااا
ههههههههههههه

صدفة جميلة يقول...

صح من حقك تتكلم بس لما يتوه منك الكلام وتحس انك مخنوق مش عارف غير انك مش عارف تايه احلام بتموت من قبل ماتكون وامال بتتحطم فى مهدها
مخنوق ومضيق يابختك لقيتى كلام وقلتيه
طب الحاسس انه مالوش نفس يتكلم اوصف ازاى الشعور البتحسى انك محطمه كل الدنيا وقفه امامك وبتحربى وبتحربى وللاسف فى نفس المكان بس بتزيد حاجه واحده الهموم والاحزان

شقاوة مراهقة يقول...

ازيك يا ايدي ..

الفضفضه دي جميله جدا ..

وبتعبر عني من كام يوم بالضبط ..

استحملي يا جميله فترة وهتعدي ان شاء الله ..

ربنا معاكي يارب ويهون عليكي .. ويبعد عنك اي هم ..

مش عارفه اقولك ايه .. بس نفسي تكوني كويسه ..

------------------

القصه بتاعت نورة فظييييييييييييييييعه .. انا قراتها من زمان .. كل جزء اما كنتي بتنزليه ..
وعجبتني اووووووووووي ..

واسلوبك تحف ما شاء الله ...

طبحا انا بعلق عليها دلوقتي لاني عملت مدونة رسمي اتمنى تنوريني هناك :d

تحياتي ليكي

غروب يقول...

ربنا يسعدك ويفرج كربك يا حبيبتى

ولو محتاجه اى مساعده انا تحت امرك واوعى تكتمى مشاعرك حتى لو حزينه كلمى نفسك واشتكى وابكي ساعات البكي بيريح


اتمنى ليكي السعاده يارب

غروب

MǿиY El-Shreef يقول...

ف حلوان

طب انا عمري مارحتها هعرف ازاي :D

ربنا يهدي سرك ويفك كربك ياقمرتي

ودايما تبقي مبسوطه ان شاء الله :)

وحشاني ياقلبي

عاشقة الأحزان يقول...

السلام عليكم

بجد وحشتينى قوووى يا نهاد

انا الحمد لله رجعت من السفر وكويسه والحمد لله

ومتشكرة قووى ليكى على سؤالك عنى ويارب يديم الاخوه بينا

طبعآ البوست جميل كعادتك
بس بلا تزعلى لان مافيش حد يستاهل نزعل عشانه

ربنا يبعد عنك الاحزان ويديم عليكى الفرح والسعاده يارب

واسمع عنك كل خير
اللهم امين يارب العالمين
تحياتى
انوسه

ABOALI يقول...

فين باقى الفضفضة

ولما غاب الجميل
عسى ان تكونى فى ظل ظليل


جئت القى السلام

الشاعر الحزين يقول...

بعيدا عن الفزوره اللى أنا حليتها وأنتى فبركتيها بالموقع الجغرافى

حلوه فبركتيها دى ؟؟؟

المهم

تعرفى بالرغم من ان حزن الدنيا مش مكفينى الا انى أكتر واحد فى الدنيا بيضحك وبيقول نكت

بس ده قدام الناس بس

لكن أجارك الله لما أكون لوحدى

صدقينى الضحكه بتهون كتير

لكن ازاى مفيش اصحاب

أمال احنا رحنا فين ؟؟

لا ملكيش حق

انسى بقى مش حكيتى وفضفضتى واحنا سمعنا ؟
يبقى لازم تنسى بقى

اسمعى الكلام عشان ما أجيش أقطع النخلتين اللى باقيين

سلام بقى

aidy يقول...

ABOALI
*********


متشكرة جدا لكلمات حضرتك دى بجد

والحمد لله انا بقيت احسن

وشعورى ابتدا يتحسن

وبجد كلامكم كلكم كان خير أنيس ليا

بشكركم كلكم عليه

aidy يقول...

mohamed ghalia

متشكرة اوى بجد يا محمد

انا بقيت كويسة وان شاء الله ارجعلكم بموضوع جديد

aidy يقول...

ديالا


ازيك يا قمر

بجد شكرا اوى على زيارتك ليا

وان شاء الله المرة الجاية اصدعكم

aidy يقول...

صوت من مصر


اهلا يا محمد ايه ده انت طلعت من حلوااااااااااااااااان


ياااااااااه مش بعيد شوية الاقى حد من جيرانى هنا


:D

بس حاول تخرج انت كمان من الحالة دى

زى ما انا بحاول اخرج منها

aidy يقول...

صوت من مصر


اهلا يا محمد ايه ده انت طلعت من حلوااااااااااااااااان


ياااااااااه مش بعيد شوية الاقى حد من جيرانى هنا


:D

بس حاول تخرج انت كمان من الحالة دى

زى ما انا بحاول اخرج منها

aidy يقول...

Rosie

روزى.. بجد شكرا على كلماتك دى

فرحتنى اوى وادتنى دفعة لكسر الحاجز ده

ويارب انتى كمان تخرجى من نفس الاحساس

aidy يقول...

Hesham


اهلا بحضرتك يا فندم صدقت فعلا فى جملتك دى


اوقات لا يشعر بالنفس الا النفس

aidy يقول...

reem


اهلا ريم

بجد نورتينى وشكرا على الزيارة وكلماتك دى بجد بشكرك عليها لانها بتعبر عن حالاتى

aidy يقول...

مصعب صلاح


اهلا مصعب شكرا لمرورك

وشكرا على كلماتك دى بجد

aidy يقول...

Sweet Violet


بجد بجد انا بحب كومنتاتك اووووووووووووووى

ومتقلقيش هصدعك جدا فى القريب العاجل


وبجد مبسوطة انك طلعتى من حلواااااااااان

طلعنا بلديات

aidy يقول...

ضحكات الحياة


اهلا بحضرتك

شكرا بجد على الزيارة والتعليق

وعلى الكلمات دى اللى رفعت روحى المعنوية

تحياتى

aidy يقول...

صدفة جميلة


اهلا بحضرتك وشكرا على الزيارة الجميلة والكلمات الاجمل

aidy يقول...

شقاوة مراهقة


بجد نورتينى انبسطت اوى بكلماتك

وفرحت اكتر انك تابعتى قصة نور


ومبسوطة انها عجبتك

ان شاء الله ازورك انتظرى منى زيارة

aidy يقول...

غروب


غروب يا حبيبتى بجد وحشتييييييييييييييييينى


ووحشنى تعليقاتك كمان

بجد شكرا على سؤالك عليا

انا هجيلك مدونتك دلوقتى اطمن عليكى

aidy يقول...

MǿиY El-Shreef


مونى وحشتينى اوى اوى اوى

انتى عاملة ايه

منتظرة منك بوست جديد قريب


متكسليش بقي

aidy يقول...

عاشقة الأحزان

اهلا يا انوووس وحشتينى

وحشنى الكلام معاكى

يارب تكونى كويسة

aidy يقول...

الشاعر الحزين


لا ارجوك الا النخلتين كفاية واحدة ماتت

هههههههههههههههه

شكرا جدا يا علاء على ردك وكلماتك دى

بجد ضحكتنى

وانا بقيت كويسة الحمد لله

شمس النهار يقول...

ازيك
اخبارك ايه
ليه انت زعلانه
ان شاء الله كله هيبقا تمام والا انتي قلقانه من النتيجه
ان شاء الله خير

معتز شاهين - باحث تربوي يقول...

الفضفضة دي ليها ناسها
خلٌ وفي
صديق صدوق
قريب قروب

يعني من الآخر واحد قريب
ياه تخيلي الدنيا لو مكنش فيها فضفضة كنا زمنا انفجرنا في وش بعض
لازم تتصرفي
ولو ملقتيش فضفضلنا واحنا حنستحمل

ويبقى التواصل

عاشقة الأحزان يقول...

السلام عليكم


حبيبتى الغاليه

انا الحمد لله يعنى احسن من الاول بكتير الحمد لله
المهم الف مليون سلامه على اختى حبيبتى

والله زعلت قووووووى عشانك

طمنينى عليكى بجد انا قلقانه عليكى قوووى

بحبك كتير ومتشكره قووى على زياراتك الغاليه
انوسه

صوت من مصر يقول...

على فكره يا هايدى انا مش من حلوان لكنى من خط واحد مترو ؟؟؟؟؟؟؟؟؟؟؟؟؟؟؟
ابعد عنك 40 محطه بالتمام

بسنت يقول...

بدايه انا بحب حلوان جدا
يمكن اكتر مكان فى القاهره بعرف اتحرك فيه بنزله كل اجازه كمكان لاقامتى واتحرك بالمترو
وفعلا الشجر فيه كتير بس الادجازه اللى فاتت فى شهر واحد بقت متغيره كتير والعمارات كترت جدا
نيجى بقى ليكى احب اطمنك ان الحاله دى شئ طبيعى لانها رد فعل لحاجات بتقابلنا وتضايقنا بس نصيحه لازم تحكى لحد عن اللى بيضايقك دورى حواليكى هتلاقى واحده بتحبيها كصديقه واخت ابدأى انتى وهتلاقى
ام مامتك فطبيعى هقول اكلهم بيخافوا علينا بس بس هى اكتر حد هيقوللك النصيحه اللى تفيدك

دمتى بخير

elsha3er يقول...

السلام عليكم

كتير منا بيحس بالاحساس دة بس صدقينى هى حالة وبتروح لوحدها هى شبه الاكتئاب

خليكى دايما واثقة من نفسك

وان شاء الله ربنا يفك كربك


تحياتى

احمد الشاعر

مصعب صلاح يقول...

السلام عليكم
فينك يا استاذة

أرجوك ما تغيبيش كتير كدا

لاسع افندى يقول...

فضفضى ولا يهمك

ريمان ونوسه فى هاكونا مطاطا يقول...

انت لسه هنا؟


لا لا تعالى بسرعه عندنا


تيمون وبوبما عايزينك


كل ما تضحك اكتر كل تاكل بطاطا اكتر

هاكونا مطاطا

مش هتقدر تغمض عنيك

هاكونا مطاطا هديتنا لكل المدونين عشان نخرج من حاله النكد

هاكونا مطاطا تهييس للصبح

هاكونا مطاطا ... لااااا للملل


هاكونا مطاطا... قول لاء للهم

هاكونا مطاطا.... اوعى تزعل ابدااا

هاكونا مطاطا... ارمى الماضى ورا ضهرك


انسى الماضى اللى يغيظ


يلاااااااااا تعالى مستنى ايه

مصعب صلاح يقول...

السلام عليكم

انت فين يا استاذ

ياريت حضرتك تطمني عليك